150 ફૂટ રીંગ રોડ પરની પેઢીનાં માલિક સહિત 3 સામે ગુનો : મશીનનાં પૈસા આપી દીધાં બાદ પેઢીને તાળાં લાગી ગયાં, EOWને તપાસ
રાજકોટ, : ગોંડલ રોડ પર પ્રથમ પ્રાઇમ બિલ્ડિંગમાં રહેતાં અને સોની બજારની જુની ગધીવાડનાં માધવ કોમ્પલેક્સમાં જય ભવાની ડાઇસ મેક નામની પેઢીમાં સોના-ચાંદીનો વેપાર કરતાં કૃણાલ ભરતભાઇ પાલા (ઉ.વ. 26)એ સીએનસી મશીન ખરીદવા આપેલા રૂ. 67.26 લાખની છેતરપિંડી કરવા અંગે સાવરીયા કોર્પોરેશન નામની પેઢીનાં માલિક રાહુલ સાગઠીયા, જયદીપ ગિરિશભાઇ નનેરા અને આશિષ પટેલ સામે ક્રાઇમ બ્રાંચમાં ફરિયાદ નોંધાઇ છે. જેની તપાસ ઇઓડબલ્યુને સોંપાઇ છે.
ફરિયાદમાં કૃણાલે જણાવ્યું છે કે, તેને સીએનસી મશીન ખરીદવી હોવાથી લોનનું કામ કરતાં નૈમિષ અનાડા મારફત રિધમ તોગડીયા સાથે સંપર્ક થયો હતો. જેણે 150 ફૂટ રીંગ રોડ પર શિલ્પ કોમ્પલેક્સમાં આવેલી સાવરીયા કોર્પોરેશન નામની પેઢી સાથે સંપર્ક કરાવી આપ્યો હતો. જ્યાં આશિષ અને જયદીપ મળ્યાં હતાં. જેમણે કહ્યું કે બંને પેઢીમાં કામ કરે છે. પેઢીનાં માલિક રાહુલભાઇ છે. જે હાજર નથી.
જેથી બંને સાથે સીએનસી મશીન ખરીદવા બાબતે વાત કરતાં રૂ. 67.26 લાખનું કોટેશન કાઢી આપ્યું હતું. જે માટે લોન લેવાની હતી. હોસ્પિટલ ચોક ખાતે એસબીઆઇ બેંકનો સંપર્ક કરતાં રૂ. 49.90 લાખની લોન મળશે તેમ કહેવાયું હતું. જેથી બાકીના રૂ. 17.36 લાખ આરટીજીએસથી સાવરીયા કોર્પોરેશનમાં ટ્રાન્સફર કર્યા હતા. લોન મંજૂર થઇ જતાં તે રકમ પણ ટ્રાન્સફર કરી દીધી હતી.
બીજા દિવસે નૈમિષભાઇને સીએનસી મશીન ક્યારે આવશે તેમ પુછતાં આશિષ તેનો ફોન ઉપાડતો નથી તેમ કહ્યું હતું. તે જ દિવસે સાંજે નૈમિષે કોલ કરી પેઢીને તાળા મારેલાં હોવાનું કહ્યું હતું. એટલું જ નહીં આશિષ અને જયદીપનો કોઇ સંપર્ક નહીં થતો હોવાનું પણ કહ્યું હતું. બીજા દિવસે તેના પિતા અને ભાઇ કિશન ઉપરાંત નૈમિષ પેઢીએ ગયા હતા ત્યારે તે બંધ મળી હતી.
આ રીતે પોતાની સાથે છેતરપિંડી થયાનું સ્પષ્ટ થતાં ત્રણેય આરોપીઓ સામે ફરિયાદ નોંધાવી હતી. જેના આધારે હવે ઇઓડબલ્યુએ તપાસ આગળ ધપાવી છે. આ કેસમાં હજુ સુધી કોઇ આરોપીની ધરપકડ નહીં થયાનું પોલીસ સુત્રોએ જણાવ્યું હતું.
