Bomb Threat In Ahmedabad: ગાંધીનગર અને અમદાવાદમાં 10મી જૂનથી 30મી સપ્ટેમ્બર દરમિયાન અલગ-અલગ મહત્ત્વના સ્થળોએ બોમ્બ બ્લાસ્ટ કરવાની ધમકી મળતાં જ પોલીસ અને સુરક્ષા એજન્સીઓ એક્શનમાં આવી ગઈ છે. કેટલાક તત્ત્વો દ્વારા જુદા-જુદા ઈમેલ આઇડી પરથી મોકલવામાં આવેલા આ ધમકીભર્યા મેઇલમાં સમયનો ઉલ્લેખ કરવામાં આવ્યો છે. જેમાં મુખ્યમંત્રી ઑફિસને બપોરે 1.11 વાગ્યે, અમદાવાદ મ્યુનિસિપલ કોર્પોરેશનની ઑફિસને બપોરે 3.11 વાગ્યે અને રાષ્ટ્રીય સ્વયંસેવક સંઘની કચેરીને સાંજે 5.11 વાગ્યે બોમ્બ બ્લાસ્ટ કરીને ઉડાવી દેવાનો ઉલ્લેખ કરવામાં આવ્યો છે.
શહેરના તમામ સંવેદનશીલ અને જાહેર સ્થળો પર સુરક્ષા વ્યવસ્થા ગોઠવાઈ
મળતી માહિતી અનુસાર, આ ધમકીને લઈને અમદાવાદ મ્યુનિસિપલ કોર્પોરેશનની દાણાપીઠ સ્થિત મુખ્ય ઑફિસ ખાતે તાત્કાલિક ધોરણે આખી બિલ્ડિંગને ખાલી કરાવી દેવામાં આવી હતી. ધમકીની ગંભીરતાને જોતાં પોલીસ કાફલો, બોમ્બ ડિસ્પોઝલ સ્કવોડ અને ડોગ સ્કવોડ ઘટનાસ્થળે દોડી ગયા હતા. આ હાઇ-ઍલર્ટને પગલે શહેરના તમામ સંવેદનશીલ અને જાહેર સ્થળો પર સુરક્ષા વ્યવસ્થા ગોઠવવામાં આવી છે. કોઈપણ ઘટનાને રોકવા માટે તમામ સ્તરે કડક ચેકિંગ હાથ ધરવામાં આવી રહ્યું છે.
આ મામલે ઉચ્ચ પોલીસ અધિકારીઓ સહિત સાયબર ક્રાઇમની સ્પેશિયલ ટીમ તાત્કાલિક એક્શન મોડમાં આવી ગઈ છે. જે ઈમેલ આઇડી પરથી આ ધમકીભર્યા મેસેજ મોકલવામાં આવ્યા છે, તેના સોર્સ અને IP એડ્રેસને ટ્રેસ કરવા માટે ટેકનિકલ સર્વેલન્સની મદદ લેવામાં આવી રહી છે.
