કરિયાણાની દુકાનો, કેબીનો અને હોટલો પર રીટેલમાં વેચાણ વર્ષોથી ખુલ્લેઆમ વેચાતા પેટ્રોલિયમ પદાર્થો છતાં કાર્યવાહીનો અભાવ : દેશમાં સર્જાયેલી આવી સ્થિતિમાં ઊંચા ભાવે પેટ્રોલ વેચી લૂંટવાનું શરૂ
ભુજ, : વૈશ્વિક યુદ્વની અસર પેટ્રોલિયમ પદાર્થો પર પડી છે. ઈંધણની અછત વચ્ચે ભાવ વધારાએ દાઝયા પર ડામ દીધો છે ત્યારે કચ્છમાં પેટ્રોલ ડીઝલની અછતનો લાભ ઉઠાવી કેટલાક ગ્રામિણ વિસ્તારોમાં કરિયાણાની દુકાનો, કેબીનો અને હોટલો પર પેટ્રોલ 15થી 20 રૂપિયા મોંઘુ વેચાઈ રહ્યું છે. જિલ્લા પુરવઠા શાખા દ્વારા છેલ્લા કેટલાક સમયથી આકસ્મિક તપાસણી કરવામાં આવી રહી છે ત્યારે કચ્છના ગ્રામિણ વિસ્તારોમાં પણ કાળાબજારીનું પ્રમાણ એકાએક વધી ગયું છે. બહોળો વિસ્તાર ધરાવતાં કચ્છ જિલ્લામાં જે ગ્રામિણ વિસ્તારથી પેટ્રોલ પંપ નજીકમાં નથી તેવા ગામોના કરિયાણાની દુકાનોના સંચાલકો ગેરકાયદે પેટ્રોલનું છૂટકમાં વેચાણ કરતા હોય છે. આ દુકાનદારો સામાન્ય દિવસોમાં પણ એક લીટરે પેટ્રોલ - ડીઝલમાં મૂળ ભાવ કરતા ૧૦ રૂપિયા વધુ ઉઘરાવતા હોય છે ત્યારે, હાલમાં દેશમાં સર્જાયેલી આ સ્થિતિમાં એક લીટરે દસથી વીસ રૂપિયાની વધારાની લૂંટ ચલાવાઈ રહી છે.
કચ્છ જિલ્લામાં 346 જેટલા પેટ્રોલ પંપ કાર્યરત છે તેમ છતાં જિલ્લામાં પેટ્રોલ ડીઝલમાં કાળાબજારી થાય છે. જિલ્લાની અમુક હોટલોમાં ચાલકોની સાંઠગાંઠથી ડીઝલની ચોરી થતી આવી છે તે વચ્ચે યુદ્વની સ્થિતિના પગલે પેટ્રોલિયમ પદાર્થોની અછત સર્જાતા અને સંગ્રહખોરીનું પ્રમાણ એકાએક વધતાં અને ભાવ વધારા વચ્ચે હવે કચ્છના ગ્રામિણ વિસ્તારોમાં કરિયાણાના દુકાનદારોએ પણ ઉઘાડી લૂંટ શરૂ કરી છે.
જે વિસ્તારોમાં પેટ્રોલ પંપ દૂર સુધી તેવા ગામોમાં કરિયાણાની દુકાનો તેમજ કેટલીક હોટલો પર છુટકમાં પેટ્રોલ ડીઝલ વેચવામાં આવે છે જે આડા દિવસોમાં પણ એક લીટરે 10 રૂપિયા વધારે વસુલ કરતા હોય છે. આવા સંચાલકોએ હાલમાં લૂંટ શરૂ કરી હોય તેમ લીટરે 15થી 20 રૂપિયા વધારી દીધી છે.
રાજ્યના અન્ય જિલ્લાઓની સાથોસાથ કચ્છમાં પણ મોટા ભાગના પેટ્રોલ પંપ ઉપર પેટ્રોલિયમ પદાર્થોના ટેન્કર આવતાં જ સ્ટોક ખલાસ થઈ જતા હોવાની વિગતો સામે આવી રહી છે. ગત રોજ ભાવ વધારા બાદ ભુજ સહિત જિલ્લામાં અનેક સ્થળોએ 'નો સ્ટોક' ના પાટીયા મારી દેવાયા હતા. આવી સ્થિતિ વચ્ચે પણ કચ્છના ગ્રામ્ય વિસ્તારોમાં ખુલ્લેઆમ પેટ્રોલ ડીઝલના કાળા બજારનો ધંધો ખુલ્લેઆમ ધમધમી રહ્યો છે. કચ્છના કેટલાક ચોક્કસ ગામોમાં કેબીનો, કરિયાણાની દુકાનોમાં પ્લાસ્ટિકની બોટલો, કેરબામાં તેમજ વાહનોમાં સીધું પેટ્રોલ ડીઝલ ભરી દેવામાં આવે છે. વર્તમાનમાં પેટ્રોલના ભાવ 97 રૂપિયા આસપાસ છે ત્યારે આવા કાળાબજારીયાઓ 115-120 રૂપિયા વસુલ કરે છે.
વર્ષોથી કચ્છના ગ્રામિણ વિસ્તારોમાં આવી રીતે ગેરકાયદે ખુલ્લેઆમ પેટ્રોલ ડીઝલ વેચવામાં આવે છે તેમ છતાં પુરવઠા વિભાગ કે પોલીસ વિભાગે કાર્યવાહી કરી નથી. ત્યારે, વર્તમાનમાં દેશમાં સર્જાયેલી આવી સ્થિતીમાં ઊંચા ભાવે વેચાતા પેટ્રોલ ડીઝલના કારોબાર સામે તંત્ર લાલ આંખ કરશે કે કેમ?
