Vadodara BJP : વડોદરા કોર્પોરેશનની ચૂંટણીના ઉમેદવારો અંગે ભાજપ દ્વારા આજે બીજા દિવસે પણ સેન્સ પ્રક્રિયા યથાવત રહી હતી. જે મોડી સાંજે પૂરી થઈ હતી હવે મામલો પ્રદેશ સમિતિ ખાતે પહોંચશે.
વડોદરામાં ચારેય ઝોનના વિવિધ ગ્રાઉન્ડ ખાતે ભાજપના નામે તરી જવા ટિકિટ લેવા કાર્યકરોનો વહેલી સવારથી જ રાફડો ફાટ્યો હતો. પાલિકાના તમામ વોર્ડ માટે વોર્ડ દીઠ 100થી વધુ કાર્યકરો ઉમટી પડતા વ્યવસ્થા જાળવવા પણ ખાસ તકેદારી લેવામાં આવી હતી. જોકે કેટલાય લાગવગિયા અને જીહજુરીયાઓ પોતાના ગોડફાધરના ભરોસે રહ્યા હતા. જ્યારે બીજી બાજુ એવી પણ વાતો વહેતી થઈ હતી કે જે હજુરિયા કાર્યકરો પોતપોતાના ગોડફાદારોના ભરોસે બેસી રહ્યા છે. આજે બીજા દિવસે વહેલી સવારથી જ શરૂ થયેલા આ મેળાવડામાં ચારસો જેટલા કાર્યકર્તાઓ ઉમટયા હતા.
તમામ ભાજપી કાર્યકરો પોતપોતાના બાયોડેટા સાથે મેળવડામાં જોડાયા હતા. ગઈકાલે મોડી રાત સુધી દાવેદારોની સેન્સ પ્રક્રિયા લેવાની કાર્યવાહી સતત ચાલી રહી હતી. પાલિકાની ચૂંટણીના ઉમેદવારોની પસંદગી પ્રક્રિયા અંતર્ગત સેન્સ લેવાની કાર્યવાહી માટે નિરીક્ષકોના આગમન અગાઉ જ આજે બીજા દિવસે ભાજપના પૂર્વ વોર્ડ પ્રમુખોને ઉમેદવારોના ચોક્કસ નામો આપવા પણ દબાણ ઊભું કર્યું હોવાનું કહેવાય છે. આવી કાર્યવાહી કરવાનું મુખ્ય કારણ શું હોઈ શકે એ બાબતે પણ ચૂંટણી લડવા ઈચ્છુક ભાજપના કાર્યકરોમાં ચર્ચાનો વિષય બન્યો હતો.
