પંચમહાલમાં હિટ એન્ડ રન: શહેરાના અણિયાદ રોડ પર અજાણ્યા વાહનની ટક્કરે બાઈકચાલકનું ઘટનાસ્થળે મોત

Hit and Run in Panchmahal: પંચમહાલ જિલ્લામાં હિટ એન્ડ રનની ઘટના સામે આવી છે. જેમાં શહેરાના અણિયાદ રોડ પાસે ગુરુવારે(14 મે) એક અજાણ્યા વાહને એક બાઈકચાલકને જોરદાર ટક્કર મારી મારી હતી. ગમખ્વાર અકસ્માતમાં 32 વર્ષીય યુવાનનું કરુણ મોત નીપજ્યું છે. અકસ્માત સર્જ્યા બાદ વાહન ચાલક ઘટનાસ્થળેથી ફરાર થઈ ગયો હતો. 

માથા અને પગમાં ગંભીર ઈજાઓ થતાં યુવાને દમ તોડ્યો

પ્રાપ્ત વિગતો મુજબ, ગોધરા તાલુકાના પેપરીયા ગામે રહેતો યુવાન પોતાની બાઈક લઈને શહેરાના અણિયાદ રોડ પરથી પસાર થઈ રહ્યા હતા. આ દરમિયાન પાછળથી આવતા એક પુરપાટ ઝડપી વાહને બાઈકને અડફેટે લીધું હતું. ટક્કર એટલી ભયાનક હતી કે યુવાન રોડ પર પટકાયો હતો અને તેને માથા તેમજ પગના ભાગે ગંભીર ઈજાઓ પહોંચી હતી. લોહીલુહાણ હાલતમાં પડેલા યુવાને ગણતરીની મિનિટોમાં જ સ્થળ પર દમ તોડી દીધો હતો.

આ પણ વાંચો: અમરેલી: રાજુલામાં નદીમાં ડૂબી જવાથી બે બાળકોના મોત, કાળઝાળ ગરમીમાં નહાવા પડ્યા હતા

શહેરા પોલીસ દ્વારા કાયદેસરની કાર્યવાહી

ઘટનાની જાણ થતાં જ આસપાસના લોકો દોડી આવ્યા હતા અને પોલીસને જાણ કરી હતી. શહેરા પોલીસનો કાફલો તાત્કાલિક ઘટનાસ્થળે પહોંચી ગયો હતો અને મૃતદેહને પોસ્ટમોર્ટમ અર્થે હોસ્પિટલ ખસેડી આગળની કાર્યવાહી હાથ ધરી છે. પોલીસે અજાણ્યા વાહન ચાલક વિરુદ્ધ ગુનો નોંધી, સીસીટીવી ફૂટેજના આધારે તેને ઝડપી પાડવા માટે તપાસના ચક્રો ગતિમાન કર્યા છે.