હાઈકોર્ટની મુદત પૂરી થવા છતાં પગાર વધારો ન મળતા
કલેક્ટર કચેરીએ આવેદનપત્ર પાઠવીને 16 ફેબુ્રઆરીએ રજૂ થનારા રાજ્યના બજેટમાં પગાર વધારાના જાહેરાતની માંગ
આગામી ૧૬ ફેબુ્રઆરીના રોજ રજૂ થનારા રાજ્યના બજેટમાં પગાર વધારાની જાહેરાત કરવામાં આવે તેવી પ્રબળ માંગ સાથે જિલ્લા કલેક્ટરને આવેદનપત્ર સોંપવામાં આવ્યું છે. વિગતો મુજબ રાજ્યભરમાં અંદાજે ૧,૪૦,૦૦૦ જેટલી આંગણવાડી અને આશા વર્કર બહેનો લાંબા સમયથી વેતન વધારા માટે લડત ચલાવી રહી છે. ખેડા જિલ્લાની બહેનોએ આ અંગે આક્રમક સુર વ્યક્ત કરતા જણાવ્યું હતું કે, ગુજરાત હાઈકોર્ટે ઓગસ્ટ માસમાં પગાર વધારા સંદર્ભે ૬ મહિનામાં નિર્ણય લેવા સરકારને આદેશ કર્યો હતો. હાઈકોર્ટ દ્વારા અપાયેલી આ મુદત આગામી ૨૦ ફેબુ્રઆરીના રોજ પૂર્ણ થઈ રહી હોવા છતાં સરકાર તરફથી હજુ સુધી કોઈ ચોક્કસ પ્રતિસાદ મળ્યો નથી. મોંઘવારીના આ સમયમાં નજીવા વેતનમાં ઘર ચલાવવું મુશ્કેલ બન્યું હોવાથી બહેનોમાં ભારે નારાજગી જોવા મળી રહી છે. નવા મજૂર કાયદાની જોગવાઈઓ સામે પણ વિરોધ નોંધાવતા બહેનોએ સ્પષ્ટ કર્યું હતું કે, જો આગામી ૨૦ ફેબુ્રઆરી સુધીમાં પગાર વધારાનો ઉકેલ નહીં આવે તો રાજ્યભરની બહેનો સાથે મળીને સમગ્ર કામકાજ ઠપ્પ કરી દેશે. આ હડતાળને કારણે જિલ્લામાં આંગણવાડીના રોજિંદા કાર્યોે પર માઠી અસર જોવા મળી હતી.
