અમદાવાદ રિવરફ્રન્ટ પર ડ્રગ્સનું નેટવર્ક ઝડપાયું: SOGએ 9.48 લાખના MD ડ્રગ્સ સાથે એકને દબોચ્યો, રાજસ્થાન કનેક્શનનો ખુલાસો

Ahmedabd Police : અમદાવાદ ક્રાઈમ બ્રાન્ચના સ્પેશિયલ ઓપરેશન ગ્રુપ (SOG) એ મંગળવારે સાંજે એલિસબ્રિજ વિસ્તારમાં રિવરફ્રન્ટ પાસેથી 21 વર્ષીય યુવક પાસેથી 9.48 લાખ રૂપિયાની કિંમતનું 94.860 ગ્રામ મેફેડ્રોન (MD ડ્રગ્સ) જપ્ત કર્યું છે. અન્ય ચીજવસ્તુઓ સહિત કુલ 9.54 લાખ રૂપિયાનો મુદ્દામાલ જપ્ત કરવામાં આવ્યો છે.

આરોપીની ધરપકડ અને કાર્યવાહી

ધરપકડ કરાયેલા આરોપીની ઓળખ રઝા અહેમદ કુરેશી તરીકે થઈ છે. જે કાલુપુરનો રહેવાસી છે અને મૂળ રાજસ્થાનના આબુ રોડનો વતની છે. તેની સામે નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ, 1985 ની સંબંધિત જોગવાઈઓ હેઠળ ધરપકડ કરવામાં આવી છે.

કેવી રીતે ઝડપાયો આરોપી?

SOG ક્રાઈમ બ્રાન્ચની ટીમને 10 ફેબ્રુઆરીએ ચોક્કસ બાતમી મળી હતી કે, પતંગ હોટલની પાછળ અને મહાકાળી માતાના મંદિરની સામે રિવરફ્રન્ટ રોડ પર હૂડી જેકેટ અને બ્લુ જીન્સ પહેરેલો એક શખ્સ વેચાણ માટે MD ડ્રગ્સ લઈને ફરી રહ્યો છે. બાતમીના આધારે SOG ની ટીમે સાંજે લગભગ 7 વાગ્યે મહાકાળી માતાના મંદિર પાસે શંકાસ્પદ શખ્સને અટકાવ્યો હતો.

જપ્ત કરાયેલ મુદ્દામાલમાં તપાસ દરમિયાન તેની હૂડીના ખિસ્સામાંથી બે પારદર્શક ઝિપલોક બેગ મળી આવી હતી. જેમાં કથ્થઈ રંગનો પાવડર હતો. આ ઉપરાંત તેનું આધાર કાર્ડ, સેમસંગ મોબાઈલ ફોન અને 600 રૂપિયા રોકડા મળી આવ્યા હતા. ફોરેન્સિક સાયન્સ લેબોરેટરી (FSL) ના વૈજ્ઞાનિક અધિકારી દ્વારા પ્રાથમિક પરીક્ષણ કરવામાં આવતા તે પદાર્થ મેફેડ્રોન હોવાનું સાબિત થયું હતું.

ડ્રગ્સનું નેટવર્ક અને અન્ય ત્રણના નામ

તપાસ દરમિયાન જાણવા મળ્યું કે કુલ 94.860 ગ્રામ ડ્રગ્સ હતું (એક પેકેટમાં 50.780 ગ્રામ અને બીજામાં 44.080 ગ્રામ). પૂછપરછ દરમિયાન આરોપી કુરેશીએ અન્ય ત્રણ વ્યક્તિઓના નામનો ખુલાસો કર્યો છે: 

1. સોહિલ બલોચ (આબુ રોડ, રાજસ્થાન): જેની પાસેથી ડ્રગ્સનો જથ્થો મેળવ્યો હતો. 

2. નઈમ શેખ: જેણે ડ્રગ્સની ડિલિવરીમાં મદદ કરી હતી. 

3. સલમાન શેખ (અમદાવાદ): જેણે 50 ગ્રામ ડ્રગ્સનો ઓર્ડર આપ્યો હતો.

પોલીસની આગામી કાર્યવાહી

પોલીસે ગેરકાયદેસર કબજો, હેરફેર અને ગુનાહિત કાવતરા હેઠળ ગુનો નોંધ્યો છે. આ ડ્રગ્સ નેટવર્કના મૂળ સુધી પહોંચવા અને બાકીના ત્રણ આરોપીઓને પકડવા માટે ચક્રો ગતિમાન કર્યા છે.