Ahmedabad News : અમદાવાદ મ્યુનિસિપલ કોર્પોરેશનની સાથે સાથે અમદાવાદ જિલ્લા પંચાયતની હાલની બોડીની મુદત આગામી 17મી માર્ચે પૂર્ણ થઈ રહી છે. આમ પણ માર્ચ મહિનો નાણાકીય વર્ષનો અંતિમ મહિનો હોવાના કારણે 31મી માર્ચ સુધીમાં તમામ બિલોની ચુકવણી જરૂરી બનતી હોય છે. ત્યારે જિલ્લા પંચાયતના કેટલાક કમિશનીયા સદસ્યો અને પદાધિકારીઓ પોતાના કોન્ટ્રાક્ટરોના બિલો કોઈ જ પ્રકારની ક્વેરી વિના ઝડપથી પાસ થઈ જાય તે માટે સક્રિય બનેલા છે.
અમદાવાદ જિલ્લા પંચાયતની બોડીની મુદ્દત પૂર્ણ થશે
સામાન્ય રીતે સાંજે ઓફિસ સમય પહેલા જ ગાપચી મારીને રવાના થઈ જનારા ઉપરોક્ત ત્રણેય શાખાના મોટાભાગના કર્મચારીઓ આવા બિલો પાસ કરવા માટે વગર પગારનો ઓવરટાઈમ કરી રહ્યા છે. સ્થાનિક સ્વરાજ્યની ચૂંટણીઓનું કાઉન્ટ-ડાઉન શરુ થયું છે, ત્યારે અમદાવાદ જિલ્લા પંચાયત જેવા જ હાલ અન્ય પંચાયતોમાં પણ જોવા મળી રહ્યા છે.
ઓવરટાઈમ કરી બિલો પાસ કરવાનો ખેલ શરૂ
કોન્ટ્રાકટરોએ હવે બિલો ઓનલાઈન રજૂ કરવાની સાથે-સાથે તેમાં કોઈ ગંભીર ભૂલ ના હોય તેની તકેદારી રાખવાની હોય છે. બાકી ડિપાર્ટમેન્ટમાં કયાં વિભાગમાં કયાં ટેબલ ઉપર કેટલો પ્રસાદ ધરાવવો તેનું કોષ્ટક તૈયાર હોવાથી અત્યારે જે-તે વિભાગના કર્મચારીઓ પણ બિલો પાસ કરવામાં ગજબનું કૌશલ્ય અને સ્ફૂર્તિ દર્શાવી રહ્યા છે.
જિલ્લામાં થોડા સમય પૂર્વે જ કેટલાક કોમ્પ્યુટર ઓપરેટરોને છૂટા કરવામાં આવ્યા હોવાથી બિલોની ચુકવણીના કામમાં થોડો બેકલોગ આવ્યો હતો. પરંતુ અહીં તો સામે જ રોકડી થતી હોય તો હાજર કેટલાક કર્મચારીઓ જાન ન્યોછાવર કરીને પણ કર્મચારીઓ ઓછા હોવાની કોઈ જ બૂમાબૂમ કર્યા વિના બધી જ શાખા સાથે સરસ સંકલન કરીને બને તો 17 માર્ચ પહેલા નહીં તો 31 માર્ચ સુધી તમામ બિલોની ચુકવણી કરી દેવા મક્કમ બની ચૂક્યા હોય તેવું લાગી રહ્યું છે.
