અમદાવાદ: દરિયાપુરમાં ટોકન સિસ્ટમથી ચાલતું જુગારધામ પકડાયું; સ્થાનિક પોલીસની સંડોવણીની તપાસ શરૂ

Dariapur Popatiawad Gambling Raid Ahmedabad: અમદાવાદ શહેરનો દરિયાપુર વિસ્તાર જુગારના અડ્ડાઓ માટે પહેલાથી જ ચર્ચામાં રહ્યો છે. તાજેતરમાં PCB સ્ક્વોડના સ્ટાફે પોપટીયાવાડમાં મોટા પાયે ચાલતા જુગારના અડ્ડા પર દરોડો પાડ્યો હતો. પોલીસે મુખ્ય આરોપી સહિત 10 વ્યક્તિઓની ધરપકડ કરીને સિક્કા તથા જુગારને લગતા સાધનો સહિતનો મુદ્દામાલ જપ્ત કર્યો હતો.

શહેરના દરિયાપુર, પોપટીયાવાડમાં આવેલા કામીલ ચોક નજીકના એક મકાનમાં મહોમ્મદ હનીફ શેખ નામનો વ્યક્તિ જુગારનો અડ્ડો ચલાવતો હોવાની બાતમી પીસીબી સ્ટાફને મળી હતી. જેના આધારે દરોડો પાડીને તપાસ કરતાં મહોમ્મદ શેખ અને અન્ય જુગારીઓ રંગેહાથ ઝડપાઈ ગયા હતા. ઘટનાસ્થળેથી 50 હજાર રૂપિયાની રોકડ, 10 મોબાઈલ ફોન અને જુગાર રમવા માટે પ્લાસ્ટિકના અલગ-અલગ રંગના સિક્કા મળી આવ્યા હતા. આ ઉપરાંત, પોલીસથી બચવા અને બહાર નજર રાખવા માટે ત્યાં સીસીટીવી કેમેરા પણ લગાવવામાં આવ્યા હતા.

પોલીસના દરોડા દરમિયાન મોટી રોકડ જપ્ત ન થાય તે માટે મહોમ્મદ હનીફ શેખ બહારથી આવતા જુગારીઓ પાસેથી રોકડ એડવાન્સમાં લઈને તેની સામે કોઈન (સિક્કા) આપતો હતો. જો કોઈ વ્યક્તિ જીતે, તો તેને કોઈનની સામે જીતેલી રકમ ચૂકવવામાં આવતી હતી. પીસીબીને તપાસ દરમિયાન આમાં સ્થાનિક પોલીસની સંડોવણીની કડીઓ મળતાં તે અંગે પણ તપાસના આદેશ આપવામાં આવ્યા છે. ઉલ્લેખનીય છે કે, દરિયાપુર પોલીસ અગાઉ મનપસંદ જીમખાના તેમજ અન્ય જુગારના અડ્ડાઓને કારણે વિવાદમાં આવી ચૂકી છે, ત્યારે આ દરોડામાં પણ સ્થાનિક પોલીસની ભૂમિકા સામે આવતા ઉચ્ચ સ્તરીય તપાસ શરૂ કરાઈ છે.