અમદાવાદ,સોમવાર
પોતાની જાતને કિન્નર તાંત્રિક તરીકે ઓળખ આપીને લોકોના રીલેશનશીપના વિવિધ પ્રશ્નોના નિરાકરણનું કહીને ફોટો મંગાવ્યા બાદ તેને વાંધાજનક રીતે એડીટ કરીને તે ફોટો વાયરલ કરવાની ધમકી આપીને જે તે વ્યક્તિને વિડીયો કોલ કરીેને ન્યૂડ કરીને સ્ક્રીન રેકોર્ડીંગ કરીને નાણાં પડાવતી રાજસ્થાનની ગેગના એક આરોપીની સાયબર ક્રાઇમ સેલ દ્વારા ધરપકડ કરવામાં આવી છે.
અમદાવાદમાં રહેતી એક મહિલાએ સાયબર ક્રાઇમ સેલમાં ફરિયાદ નોંધાવી હતી કે તેમને પ્રેમસંબધના મામલે અણબનાવ હોવાથી તે ચિંતામાં રહેતા હતા. થોડા દિવસ પહેલા તેમણે ઇન્સ્ટાગ્રામ પર એસ્ટ્રોલજર પૂજા કિન્નર માં નામના આઇડી પર જણાવવામાં આવ્યું હતું કે પ્રેમસંબધ કે લગ્ન જીવનની સમસ્યા તાંત્રિક વિધીથી હલ કરવામાં આવશે.
જેથી તે મહિલાએ સંપર્ક કરતા કોલ રીસીવ કરનારે વિધી કરીને પ્રશ્ન હલ કરવાની ખાતરી આપીને અલગ અલગ ફોટો મંગાવીને તે ફોટાઓ એડીટ કરીને મહિલાને બદનામ કરવાની ધમકી આપીને તેને વિડીયો કોલ કરીને ન્યૂડ કરાવીને સ્ક્રીન રેકોર્ડ કરતા હતા. ત્યારબાદ મહિલાને વિડીયો મોકલીને બ્લેકમેઇલ કરીને નાણાં પડાવ્યા હતા. આ અંગે સાયબર ક્રાઇમ સેલ દ્વારા ટેકનીકલ એનાલીસીસના આધારે તપાસ કરીને રાજસ્થાનના બિકાનેરમાં રહેતા રજનીશ ભાર્ગવ નામના યુવકને ઝડપી લીધો હતો.
આ અંગે સાયબર ક્રાઇમ સેલના ડીસીપી લવીના સિન્હાએ જણાવ્યું કે રજનીશ સાથે વિકાસ ભાર્ગવ અને રવિ ભાર્ગવ પણ સંડોવાયેલા હતા. આરોપીઓ કિન્નરના નામે ઇન્સ્ટાગ્રામ અને ફેસબુક પર જાહેરાત મુકીને લોકોને છેતરતા હતા. તેમણે અઢી વર્ષમાં ૫૦ લાખ જેટલી રકમ લોકોને બ્લેકમેઇલ કરીને પડાવ્યા હતા. આ પ્રકારના કિસ્સામાં લોકો બદનામીના ડરથી ફરિયાદ કરતા નથી. પણ ભોગ બનનાર લોકોની ઓળખ પોલીસ છુપી રાખશે અને ભોગ બનનાર પોલીસનો સપંર્ક કરે.
