અમદાવાદમાં બ્રાન્ડેડ કંપનીઓના નામે નકલી સામાન વેચવાનું રેકેટ, 3 શખસોની ધરપકડ

Fake Branded Goods Racket In Ahmedabad: અમદાવાદમાં જાણીતી કંપનીઓના પેકિંગ અને લોગોની આબેહૂબ નકલ કરી ગ્રાહકોને નકલી સામાન પધરાવી આર્થિક લાભ ખાટતી ટોળકી સક્રિય થઇ છે. અમદાવાદ ક્રાઇમ બ્રાંચે એસ. જી. હાઇવે પર આવેલા સોલા ભાગવત ગેટ નજીકથી નકલી સિગારેટ, ઘી, ચા અને મસાલા સહિતની જીવનજરૂરી ચીજવસ્તુઓનું વેચાણ કરતા 3 શખસોને ઝડપી પાડ્યા છે. કોપીરાઇટ એક્ટના ભંગ બદલ પોલીસે આ ત્રણેય સામે ગુનો નોંધી કાયદેસરની કાર્યવાહી હાથ ધરી છે.

બેંગ્લોરની કંપનીની બાતમી અને ક્રાઇમ બ્રાંચનું ઓપરેશન

સમગ્ર ઘટનાની વિગત એવી છે કે, બેંગ્લોર સ્થિત એક ઓથોરાઇઝ્ડ એજન્સીના અધિકારીને અમદાવાદમાં બ્રાન્ડેડ કંપનીની નકલી સિગારેટ વેચાતી હોવાની ચોક્કસ બાતમી મળી હતી. જેના આધારે એજન્સીના અધિકારીએ ડમી ગ્રાહક બનીને નકલી સામાન વેચતા શખસનો સંપર્ક કર્યો હતો અને મોટા જથ્થામાં માલ ખરીદવાના બહાને તેને સોલા ભાગવત ગેટ પાસે બોલાવ્યો હતો. આ દરમિયાન ક્રાઇમ બ્રાંચની ટીમે ઘટનાસ્થળે વોચ ગોઠવી દીધી હતી.

ત્યાં કાર લઇને પહોંચેલા ત્રણ શખસો અરુણકુમાર ગુપ્તા, સચિન ગુપ્તા અને સુજીત પોદ્દારને પોલીસે ઘેરી લીધા હતા. કારની તલાશી લેતા પોલીસ પણ ચોંકી ઉઠી હતી. કારમાંથી માત્ર નકલી સિગારેટ જ નહીં, પરંતુ રોજિંદા જીવનમાં ઉપયોગમાં લેવાતી અનેક જાણીતી બ્રાન્ડ્સનો નકલી જથ્થો મળી આવ્યો હતો.

આ પણ વાંચો: છોટા ઉદેપુરની તાલુકા પંચાયતની ચૂંટણીમાં નવો વિવાદ, જીત બાદ વિજય સરઘસમાં બંદૂક સાથે દેખાયા ભાજપ નેતા

ઝડપાયેલો નકલી મુદ્દામાલ

પોલીસે આરોપીઓ પાસેથી સિગારેટના 44 મોટા પેકેટ, અમૂલ ઘીના 15 પાઉચ, ચાના 12 પેકેટ, ડીટર્જન્ટના 14 પેકેટ અને મસાલાના 60 પેકેટ, બીડીના 15 પેકેટ સહિત કુલ મુદ્દામાલ 3,09,197 રૂપિયાનો સામન જપ્ત કર્યો હતો. પોલીસની પ્રાથમિક પૂછપરછમાં મુખ્ય સૂત્રધાર સુજીત પોદ્દારે કબૂલાત કરી હતી કે, તે અલગ-અલગ સ્થાનો પરથી સસ્તા ભાવે આ ડુપ્લિકેટ માલ ખરીદી લાવતો હતો. ત્યારબાદ અરુણ અને સચિન મારફતે આ સામાન બજારમાં છૂટક ગ્રાહકો તથા નાના દુકાનદારોને ઓરિજિનલ ભાવે પધરાવી દેવામાં આવતો હતો.

રાજસ્થાનમાં ઉત્પાદન નબળા વિસ્તારોની નાની દુકાનોમાં વેચાણ

અમદાવાદ ક્રાઈમ બ્રાન્ચના ACP એ જણાવ્યું હતું કે, "મુખ્ય આરોપી સુજીત છેલ્લા દોઢ વર્ષથી શબ્બીર, પવન સિંધી અને જગદીશ પટેલ નામના શખ્સો પાસેથી વધુ નફાની લાલચમાં આ નકલી માલ લાવતો હતો. અરુણ અને સચિન નામના બે ભાઇઓ ગ્રાહકોની ડિમાન્ડ મુજબ ડિલિવરી પહોંચાડવાનું કામ કરતા હતા. આ નકલી વસ્તુઓનું ઉત્પાદન મોટાભાગે રાજસ્થાનમાં થાય છે અને આ લોકો ફેરિયાઓ મારફતે આર્થિક રીતે નબળા વિસ્તારોની નાની દુકાનોમાં આ માલ ઓરિજિનલ ભાવે પધરાવી દેતા હતા."

સ્વાસ્થ્ય સાથે ચેડાં: લેબોરેટરીમાં મોકલાયો સામાન

પકડાયેલી તમામ વસ્તુઓ લોકોના સ્વાસ્થ્ય અને ખાણીપીણી સાથે જોડાયેલી હોવાથી ક્રાઇમ બ્રાંચે તેને પૃથ્થકરણ (એનાલિસિસ) માટે લેબોરેટરીમાં મોકલી આપી છે અને સંબંધિત વિભાગોને પણ આ અંગે જાણ કરી છે. હાલમાં પોલીસે કોપીરાઈટ એક્ટ મુજબ ગુનો નોંધીને ત્રણેય આરોપીઓની વધુ પૂછપરછ હાથ ધરી છે. લેબોરેટરી રિપોર્ટ આવ્યા બાદ કાયદાની અન્ય કલમોનો ઉમેરો કરવામાં આવશે. આ કૌભાંડમાં સામેલ ગુજરાત બહારના મુખ્ય સપ્લાયરોને પકડવા માટે ક્રાઇમ બ્રાંચની અલગ-અલગ ટીમો રવાના કરવામાં આવી છે.