અમદાવાદ: બગોદરા-વટામણ હાઇવે પર કેમિકલ ચોરીનું કૌભાંડ ઝડપાયું, 34 લાખના મુદ્દામાલ સાથે બેની ધરપકડ

Ahmedabad Crime News: અમદાવાદ ગ્રામ્ય વિસ્તારના બગોદરા-વટામણ હાઈવે પર ચાલતા હાઈવે રોબરી અને કેમિકલ ચોરીના એક બહુ મોટા નેટવર્કનો પર્દાફાશ થયો છે. અમદાવાદ ગ્રામ્ય લોકલ ક્રાઇમ બ્રાન્ચ (LCB)ની ટીમે મેમર ગામની સીમમાં આવેલી એક હોટલના કમ્પાઉન્ડમાં મોડી રાત્રે દરોડો પાડીને કેમિકલ ચોરી કરતા બે આરોપીઓને ઝડપી પાડ્યા હતા. પોલીસે ઘટનાસ્થળેથી ટેન્કર અને કિંમતી કેમિકલ સહિત કુલ 34,40,650 રૂપિયાનો મુદ્દામાલ જપ્ત કર્યો છે.

FSL અને ફાયર ફાઇટરની ટીમને સાથે રાખીને પોલીસેના દારોડા

મળતી માહિતી અનુસાર, કંડલા બંદરથી અત્યંત જ્વલનશીલ 'મિક્સ ઝાયલીન' કેમિકલ ભરીને એક ટેન્કર સુરત તરફ જઈ રહ્યું હતું. આ દરમિયાન બગોદરા-વટામણ હાઈવે પર આવેલી 'જય માતાજી હોટલ'ના કમ્પાઉન્ડમાં ટેન્કરને ઊભું રાખી, તેના વાલ્વનું સીલ તોડીને કેમિકલ ચોરી કરવામાં આવી રહ્યું હોવાની માહિતી LCBને મળી હતી. કેમિકલ અત્યંત જ્વલનશીલ હોવાથી કોઈ દુર્ઘટના ના સર્જાય તે માટે પોલીસે એફ.એસ.એલ. (FSL) અને ફાયર ફાઇટરની ટીમને સાથે રાખીને મોડી રાત્રે દરોડા પાડ્યા હતા. 

આ પણ વાંચો: અમદાવાદ: ખાનપુરમાંથી નવજાત શિશુનો મૃતદેહ મળી આવતા ચકચાર, પોલીસ તપાસ શરૂ

વાલ્વનું સીલ તોડી પ્લાસ્ટિકના કેરબામાં ભરાતું હતું કેમિકલ

પોલીસ જ્યારે હોટલના કમ્પાઉન્ડમાં પહોંચી ત્યારે ટેન્કરમાંથી કેમિકલ કાઢીને પ્લાસ્ટિકના મોટા કેરબાઓમાં ભરવાની કામગીરી ચાલતી હતી. પોલીસે ઘટનાસ્થળેથી ટેન્કરના ડ્રાઈવર અહેમદ ટીંબલિયા અને ચોરીનું કેમિકલ ખરીદવા/કાઢવામાં મદદ કરનાર જયરાજ રાઠોડ નામના બે આરોપીઓને રંગેહાથ ઝડપી લીધા હતા. જો કે, આ કૌભાંડનો મુખ્ય સૂત્રધાર અને હોટલ સંચાલક દીપક ચૌહાણ પોલીસને જોઈને ફરાર થઈ ગયો હતો, જેને પકડવા ચક્રો ગતિમાન કરાયા છે.

34.40 લાખથી વધુનો મુદ્દામાલ જપ્ત

બગોદરા પોલીસે ઘટનાસ્થળેથી અલગ-અલગ વસ્તુઓ કબજે કરી કાયદેસરની કાર્યવાહી હાથ ધરી છે, જેમાં 28.64 લાખ રૂપિયાની કિંમતનું 'મિક્સ ઝાયલીન' કેમિકલ,  કેમિકલ ભરેલું ટેન્કર, પ્લાસ્ટિકના કેરબા અને મોબાઈલ ફોન સહિત કુલ 34,40,650 રૂપિયાનો મુદ્દામાલ જપ્ત કર્યો હતો.  

BNS હેઠળ ગુનો નોંધી તપાસ તેજ કરાઈ

હાઈવે પર આ પ્રકારે જ્વલનશીલ કેમિકલની ચોરી કરીને સામાન્ય માનવ જિંદગી જોખમાય તે રીતે ચાલી રહેલા આ જોખમી કારોબાર બદલ બગોદરા પોલીસ મથકે ભારતીય ન્યાય સંહિતા (B.N.S.) ની વિવિધ કલમો હેઠળ ગુનો નોંધવામાં આવ્યો છે. આ કૌભાંડ કેટલા સમયથી ચાલતું હતું, અગાઉ કેટલા લીટર કેમિકલની ચોરી થઈ ચૂકી છે અને આ નેટવર્કમાં અન્ય કયા મોટા માથાઓ સંડોવાયેલા છે તે દિશામાં પોલીસે તપાસ શરૂ કરી છે.