ભારતના બ્રિક્સ સંમેલનમાં આવવાનો ઈરાનના સ્પીકરનો ઈન્કાર: દૂતાવાસે આપ્યું કારણ

Delhi BRICS Forum 2026 : નવી દિલ્હીમાં યોજાનારા 12માં બ્રિક્સ સંસદીય ફોરમ પૂર્વે ઈરાને એક મોટો નિર્ણય જાહેર કર્યો છે. ઈરાનની સંસદના અધ્યક્ષ ડૉ. મોહમ્મદ-બાકર કલીબાફ કેટલાક અણધાર્યા સંજોગોના કારણે આ આંતરરાષ્ટ્રીય બેઠકમાં વ્યક્તિગત રીતે ઉપસ્થિત રહી શકશે નહીં. નવી દિલ્હી સ્થિત ઈરાની દૂતાવાસે 24 ઓક્ટોબરે આ અંગે સત્તાવાર નિવેદન જારી કર્યું હતું. જોકે, સંસદ અધ્યક્ષ ગેરહાજર રહેવા છતાં ઈરાનનું સંસદીય પ્રતિનિધિમંડળ આ સંમેલનમાં સંપૂર્ણ રીતે ભાગ લેશે.

સંસદીય પ્રતિનિધિમંડળ કરશે ઈરાનનું પ્રતિનિધિત્વ

ઈરાની દૂતાવાસે સ્પષ્ટતા કરી છે કે, સર્વોચ્ચ સંસદીય નેતૃત્વની ગેરહાજરી છતાં દેશનું પ્રતિનિધિમંડળ બેઠકમાં સક્રિય રહેશે. બ્રિક્સના એક જવાબદાર સભ્ય તરીકે ઈરાન આ સંગઠનની પ્રવૃત્તિઓ અને પરિષદોમાં રચનાત્મક ભાગીદારી માટે પ્રતિબદ્ધ છે. આ મંચ પર ઈરાન અન્ય સભ્ય દેશો સાથે વિવિધ સ્તરે ચર્ચા-વિચારણા અને સહયોગ ચાલુ રાખશે.

દ્વિપક્ષીય અને બહુપક્ષીય સંબંધો મજબૂત કરવા પર ભાર

ઈરાની પ્રતિનિધિમંડળ પરિષદ દરમિયાન બ્રિક્સ દેશોના પ્રતિનિધિઓ સાથે સંસદીય સંબંધોને વિસ્તૃત કરવા માટે વાતચીત કરશે. પરસ્પર હિતોનું રક્ષણ કરવા, રાજદ્વારી સંવાદ જાળવી રાખવા અને બહુપક્ષીય સહકારને આગળ વધારવા માટે આ મુલાકાત મહત્વપૂર્ણ બની રહેશે.

ભારતના આતિથ્ય સત્કાર બદલ ઈરાને આભાર માન્યો

આંતરરાષ્ટ્રીય સ્તરની આ મહત્વની બેઠકની યજમાની અને ઉત્તમ વ્યવસ્થાઓ બદલ ઈરાની દૂતાવાસે ભારત સરકારનો આભાર વ્યક્ત કર્યો છે. દૂતાવાસે વિશ્વાસ વ્યક્ત કર્યો હતો કે 12મા બ્રિક્સ સંસદીય ફોરમથી સભ્ય રાષ્ટ્રો વચ્ચેના પરસ્પર સંબંધો અને જોડાણને મજબૂત બનાવતા સકારાત્મક પરિણામો પ્રાપ્ત થશે.

26 અને 27 ઓક્ટોબરે યોજાશે 12મું બ્રિક્સ સંસદીય ફોરમ

ભારતીય સંસદ દ્વારા નવી દિલ્હી સ્થિત સંસદ ભવન પરિસરના બંધારણ સદનના સેન્ટ્રલ હોલમાં 26 અને 27 ઓક્ટોબર દરમિયાન આ ફોરમનું આયોજન કરવામાં આવ્યું છે. 26 ઓક્ટોબરે શરૂ થનારી આ બેઠકમાં બ્રિક્સ દેશોના સંસદ અધ્યક્ષો અને પ્રતિનિધિઓ ભાગ લઈને વૈશ્વિક શાંતિ, સંસદીય સંવાદ અને પરસ્પર સહયોગના મુદ્દાઓ પર વિસ્તૃત ચર્ચા કરશે.