International Yoga Day: વિશ્વની સાથે આજે (21મી જૂન) અમદાવાદમાં પણ આંતરરાષ્ટ્રીય યોગ દિવસની ઉત્સાહભેર ઉજવણી કરવામાં આવી હતી. અમદાવાદ મ્યુનિસિપલ કોર્પોરેશન (AMC) દ્વારા સાબરમતી રિવરફ્રન્ટ ખાતે 12મા આંતરરાષ્ટ્રીય યોગ દિવસના ભવ્ય કાર્યક્રમનું આયોજન કરવામાં આવ્યું હતું. આ વર્ષે આંતરરાષ્ટ્રીય યોગ દિવસ 'Yoga for Healthy Aging' (સ્વસ્થ વૃદ્ધાવસ્થા માટે યોગ) ની ખાસ થીમ પર ઉજવવામાં આવ્યો હતો, જેમાં મોટી સંખ્યામાં અમદાવાદીઓએ ઉત્સાહપૂર્વક ભાગ લઈ યોગા કર્યા હતા.
મંત્રીઓ અને મહાનુભાવોની ગરિમામય ઉપસ્થિતિ
સાબરમતી રિવરફ્રન્ટ ખાતે આયોજિત આ કાર્યક્રમમાં શહેરી વિકાસ રાજ્ય મંત્રી દર્શનાબહેન વાઘેલા અને લોકસભા સાંસદ દિનેશ મકવાણા વિશેષ રૂપે ઉપસ્થિત રહ્યા હતા. આ ઉપરાંત અમદાવાદ મ્યુનિસિપલ કોર્પોરેશનની સ્ટેન્ડિંગ કમિટીના ચેરમેન, ધારાસભ્યો અમિત શાહ સહિત મોટી સંખ્યામાં શહેરીજનોએ સાથે મળીને વિવિધ આસનો અને પ્રાણાયામ કર્યા હતા. આ કાર્યક્રમ દરમિયાન કોલકાતા ખાતેથી વડાપ્રધાન નરેન્દ્ર મોદીના ઉદબોધનનું જીવંત (લાઈવ) પ્રસારણ કરવામાં આવ્યું હતું, જેને રિવરફ્રન્ટ પર ઉપસ્થિત તમામ યોગસાધકોએ નિહાળ્યું હતું.
આ પ્રસંગે શહેરીજનોને સંબોધિત કરતા શહેરી વિકાસ રાજ્ય મંત્રી દર્શનાબહેન વાઘેલાએ જણાવ્યું હતું કે, 'યોગ એ આપણી પ્રાચીન ભારતીય પરંપરા અને સંસ્કૃતિનો અણમોલ હિસ્સો છે, જે અદભુત વિદ્યા આપણા ઋષિમુનિઓએ સમગ્ર દુનિયાને આપી છે.'
