અમદાવાદ: રિક્ષાચાલકના પુત્રને NDAમાં પ્રવેશ મળ્યો

અમદાવાદ, તા. 27 ફેબ્રુઆરી 2022 રવિવાર

અમદાવાદના બાપુનગર વિસ્તારમાં રહેતો હેમલ શ્રીમાળી જ્યારે શાળામાં અભ્યાસ કરી રહ્યો હતો ત્યારે શહીદ મેજર રિષિકેશ રામાણીના પિતા વલ્લભ રામાણીના હાથે શૈક્ષણિક શ્રેષ્ઠતા બદલ પુરસ્કાર મળ્યુ હતું. તે સમયે વલ્લભ રામાણીએ હેમલને સૈનિક શાળા માટે પરીક્ષા આપવા માટે પ્રોત્સાહિત કર્યો હતો. વલ્લભ રામાણીની વાત માનીને હેમલે પરીક્ષા આપી અને ઉત્તીર્ણ થયો. વર્ષ 2021ના અંતમાં તેણે નેશનલ ડિફેન્સ એકેડેમીની પરીક્ષા પણ પાસ કરી હતી. તાજેતરમાં જ તેને મહારાષ્ટ્રના પુના શહેરની પાસે આવેલા ખડકવાસલા ખાતે એનડીએમાં પ્રવેશ મળ્યો છે.

હેમલના પિતા મુકેશ શહેરમાં રિક્ષા ચલાવે છે. તેમને પોતાના દીકરા પર ગર્વ છે. તેઓ કહે છે કે, હેમલ પરિવારનો પહેલો એવો સભ્ય છે જે યુનિફોર્મ પહેરશે. મુકેશ શ્રીમાળી જણાવે છે કે, મારા સસરા રાજ્ય પોલીસમાં કાર્યરત હતા અને હું પણ હોમગાર્ડમાં સ્વૈચ્છિક કામ કરતો હતો. પરંતુ મારી પત્ની જે શહીદોની વાતો હેમલને કહેતી હતી તેનાથી તે ઘણો પ્રેરિત થયો છે. તે જ્યારે બાળમંદિરમાં હતો અને પૂછવામાં આવ્યુ હતું કે મોટો થઈને તે શું બનવા માગીશ તો તેણે ત્યાં સૈનિક લખ્યુ હતું. હવે જ્યારે તેણે એનડીએમાં પ્રવેશ મેળવ્યો છે તે અમારા માટે ઘણી ભાવનાત્મક વાત છે. આખરે તેનું બાળપણનું સપનું સાકાર થયું છે.

વલ્લભ રામાણી જણાવે છે કે, હેમલ એક હોશિયાર વિદ્યાર્થી છે. જ્યારે તે નાનો હતો ત્યારે અમે શાળામાં સારું પ્રદર્શન કરવા બદલ વિદ્યાર્થીઓને પુરસ્કાર આપ્યા હતા, તેમાંથી એક હતો. તે ઘણાં પ્રશ્નો પૂછતો હતો. સૈનિક શાળામાં પ્રવેશ મેળવ્યા પછી પણ તે સંપર્કમાં હતો અને અમારી ઓફિસની મુલાકાત લેતો રહેતો હતો. ઓફિસમાં અમે રિષિકેશનો યુનિફોર્મ અને અન્ય વસ્તુઓ સાચવીને રાખી છે. હેમલને કેપ્ટન નિલેશ સોની મેડલ ફોર બેસ્ટ એનડીએ કેડેટ 2021-22 પણ મળ્યો હતો.