અમદાવાદ: નરોડામાં મહિલાને શખ્સે લગ્નની લાલચ આપી દુષ્કર્મ આચર્યું, રોકાણના બહાને 18 લાખ પડાવ્યા, પીડિતાએ કરી ફરિયાદ

Ahmedabad News: અમદાવાદના નરોડામાં એક ચોંકાવનારો કિસ્સો સામે આવ્યો છે. જેમાં એક શખ્સે 44 વર્ષીય મહિલા સાથે અવારનવાર દુષ્કર્મ આચરવાની સાથે, અલગ-અલગ જગ્યાએ રોકાણ કરી નફો કમાવવાની લાલચ આપીને કટકે-કટકે કુલ 18 લાખ રૂપિયા જેટલી રકમ પડાવી લીધી હોવાની ઘટના અંગે નરોડા પોલીસ મથકમાં ફરિયાદ નોંધવામાં આવી છે.

પોલીસ ફરિયાદમાં જણાવ્યા અનુસાર, ભોગ બનનાર મહિલાનો આશરે 11 મહિના અગાઉ બ્રિજેશ પટેલ નામના વ્યક્તિ સાથે ફોન અને વોટ્સએપથી સંપર્ક થયો હતો. સમય જતાં આ ઓળખાણ મિત્રતામાં પરિણમી હતી. આ લાભ ઉઠાવીને બ્રિજેશે મહિલાને લગ્ન કરવાનો ખોટો વાયદો આપ્યો હતો. આ સાથે જ તેણે હોટલ તેમજ ઘરમાં લઈ જઈને મહિલા સાથે અનેકવાર શારીરિક સંબંધો બાંધ્યા હતા. આ જ સમયગાળા દરમિયાન, રોકાણ પર ઊંચા વળતરની લાલચ બતાવીને તેણે મહિલા પાસેથી 18 લાખ રૂપિયા પણ પડાવી લીધા હતા.

જોકે, જ્યારે મહિલાએ પોતે આપેલા રૂપિયા અને તેના પર થતા નફાની ઉઘરાણી શરૂ કરી, ત્યારે બ્રિજેશે બહાના કાઢવાનું શરૂ કર્યું હતું. ધીમે ધીમે તેણે મહિલા સાથે વાતચીત કરવાનું અને મળવાનું પણ ટાળ્યું હતું. આખરે, આરોપીએ લગ્ન કરવાની ના પાડીને તમામ સંબંધો કાપી નાખ્યા હતા અને મહિલાના રૂપિયા પોતે વાપરી નાખ્યા હોવાની કબૂલાત પણ કરી હતી. પોતાની સાથે થયેલી આ છેતરપિંડી બાદ પીડિતાએ નરોડા પોલીસ સ્ટેશનમાં બ્રિજેશ સામે ફરિયાદ નોંધાવી છે.