Ahmedabad Accident: અમદાવાદના કલગી ચાર રસ્તા પાસે ગત મોડી રાતે બેફામ ગતિએ આવતી એક કારચાલકે સ્ટેયરિંગ પરથી કાબૂ ગુમાવતા ગંભીર અકસ્માત સર્જાયો હતો. નશાની હાલતમાં હોવાનું મનાતા યુવકોએ એક ઈકોને જોરદાર ટક્કર મારતા ગાડી રોડ પર પલટી ખાઈ ગઈ હતી. આ અકસ્માતમાં ઈકોમાં સવાર એક મહિલા અને પુરુષને ગંભીર ઈજાઓ પહોંચતા સારવાર અર્થે હોસ્પિટલ ખસેડાયા હતા.
ઈકો પલટી મારી ગઈ, મુસાફરોના જીવ જોખમમાં મુકાયા
પ્રત્યક્ષદર્શીઓના જણાવ્યાનુસાર, અકસ્માત એટલો ભીષણ હતો કે પૂરપાટ ઝડપે આવતી કારની ટક્કર વાગતા જ ઈકો ફંગોળાઈને આખી પલટી મારી ગઈ હતી. ઈકોમાં સવાર મુસાફરો લોહીલુહાણ હાલતમાં અંદર ફસાયા હતા. અકસ્માતનો અવાજ સાંભળી આસપાસના લોકો તાત્કાલિક મદદે દોડી આવ્યા હતા અને ઈજાગ્રસ્તોને બહાર કાઢી એમ્બ્યુલન્સ મારફતે નજીકની હોસ્પિટલ મોકલી આપ્યા હતા.
નશામાં ધૂત ચાર નબીરાઓ કારમાં સવાર હતા
સ્થાનિક લોકોમાં ચર્ચા છે કે અકસ્માત સર્જનાર કારમાં ચાર નવયુવાનો સવાર હતા અને તેઓ નશાની હાલતમાં હતા. નશાના કેફમાં બેફામ ગતિએ ગાડી ચલાવીને નિર્દોષ નાગરિકોના જીવ જોખમમાં મૂકનારા આ નબીરાઓ સામે લોકોમાં ભારે આક્રોશ જોવા મળ્યો હતો. અકસ્માત સર્જાયા બાદ યુવકોએ ત્યાંથી છટકવાનો પ્રયાસ કર્યો હોવાનું પણ જાણવા મળ્યું છે.
ઘટનાની જાણ થતા જ પોલીસ કાફલો પણ સ્થળ પર પહોંચ્યો હતો અને ટ્રાફિક ક્લિયર કરાવી કાયદેસરની કાર્યવાહી હાથ ધરી હતી. અમદાવાદના માર્ગો પર સતત વધી રહેલા નશાખોર નબીરાઓના આતંકને ડામવા માટે પોલીસ કડકમાં કડક પગલાં લે તેવી માંગ સ્થાનિકો કરી રહ્યા છે. પોલીસે હાલમાં ફરાર યુવકોની શોધખોળ અને અકસ્માત અંગેનો ગુનો નોંધવાની તજવીજ હાથ ધરી છે.
