અમદાવાદના રાણીપમાં તીક્ષ્ણ હથિયારોના ઘા ઝીંકી યુવકની હત્યા, જૂની અદાવતમાં ખેલાયો લોહિયાળ ખેલ

Ahmedabad Crime News: અમદાવાદના રાણીપ વિસ્તારમાં 15મી ઓગસ્ટની મોડી રાત્રે યુવકની જાહેરમાં હત્યા કરાયાની ઘટના સામે આવી હતી. RTO ચાર રસ્તા નજીક 37 વર્ષીય અજય સાલ્વી નામના યુવક પર વિશાલ ચૌહાણ અને તેના 8થી 10 જેટલા સાગરીતોએ તલવાર અને ધારિયા જેવા તીક્ષ્ણ હથિયારો સાથે અચાનક હુમલો કરી દીધો હતો. હુમલાખોરોએ અજયની પીઠમાં 15થી વધુ ઊંડા ઘા ઝીંકી દીધા હતા, જેના કારણે તેના પેટના આંતરડા પણ બહાર આવી ગયા હતા. ગંભીર રીતે ઈજાગ્રસ્ત યુવકને તાત્કાલિક સારવાર અર્થે હોસ્પિટલ ખસેડવામાં આવ્યો હતો, પરંતુ સારવાર પહેલાં જ તેનું મોત નીપજ્યું હતું.

જૂની અદાવતમાં યુવકની હત્યા

મળતી માહિતી અનુસાર, આ હત્યા પાછળ જૂની અદાવત હોવાનું પોલીસની પ્રાથમિક તપાસમાં બહાર આવ્યું છે. થોડા સમય પૂર્વે આરોપીઓ અને મદ્રાસી સમાજના કેટલાક લોકો વચ્ચે કોઈ બાબતે ઝઘડો થયો હતો. આ વિવાદમાં મૃતક અજયે વચ્ચે પડીને મદ્રાસી સમાજના લોકોનો પક્ષ લીધો હતો અને આરોપીઓનો વિરોધ કર્યો હતો. આ જ બાબતની અદાવત રાખીને આરોપીઓ અજયને પતાવી દેવાની તલાશમાં હતા. ગઈકાલે રાત્રે મોકો મળતાં જ હથિયારોથી ટોળાએ યુવકને આંતરીને તેના પર જીવલેણ હુમલો કર્યો હતો અને ત્યારબાદ તમામ આરોપીઓ ઘટનાસ્થળેથી ફરાર થઈ ગયા હતા.

પીકઅપ ડાલામાં આવેલા હુમલાખોરોએ હત્યા કરી

આ મામલે એસીપી (ACP) દ્વારા ઘટના અંગેની વિગતવાર માહિતી આપતાં જૂની અદાવત અને પેરોલ/જામીન પર છૂટેલા રીઢા ગુનેગારની સંડોવણી હોવાનો ઘટસ્ફોટ કરાયો છે.

એસીપીના જણાવ્યા અનુસાર, મૃતક રણછોડ ઉર્ફે અજય રાજુ સાલ્વી સુભાષબ્રિજ સર્કલ પાસે ચા પીવા ઊભો હતા. આ દરમિયાન રાજસ્થાન પાસિંગની પીકઅપ ડાલામાં આવેલા 5 થી 7 શખસોએ અચાનક આવીને અજય પર ધારિયા, તલવાર અને છરી વડે પીઠ, પેટ અને ગરદન પર સખત ઘા ઝીંકી દીધા હતા. ગંભીર રીતે ઘવાયેલા અજયને તેના કૌટુંબિક ભાઈ ભારત લક્ષ્મણ સાલ્વી 108 એમ્બ્યુલન્સ મારફતે તાત્કાલિક હોસ્પિટલ લઈ ગયા હતા, જ્યાં ફરજ પરના તબીબોએ તેમને મૃત જાહેર કર્યા હતા.

ભારત સાલ્વીની ફરિયાદના આધારે પોલીસે મુખ્ય આરોપી તરીકે વિશાલ પરસોત્તમ ચૌહાણ અને તેના સાગરીતો સામે ગુનો નોંધ્યો છે. મુખ્ય આરોપી વિશાલ એક રીઢો ગુનેગાર છે, જેને વર્ષ 2022માં હત્યા કેસમાં આજીવન કેદની સજા થઈ હતી. તે સપ્ટેમ્બર 2023માં જામીન પર બહાર આવ્યો હતો અને છેલ્લે 2025ના એક ગુનામાં જેલમુક્ત થયો હતો.

હત્યા પાછળના મુખ્ય કારણો અને જૂની દુશ્મનાવટ અંગે વિગતો આપતાં એસીપીએ જણાવ્યું હતું કે, અગાઉ ભદ્રેશ શર્મા અને એક મદ્રાસી છોકરા વચ્ચે વિવાદ થયો હતો, જેમાં મૃતક અજય સાલ્વીએ મદ્રાસી પક્ષનો સાથ આપતાં આરોપીઓ સાથે વેર બંધાયું હતું. હત્યાના 3-4 દિવસ પહેલાં અંકિત અને પાર્થ ઉર્ફે પાવડરે મૃતકના ભાઈ સાથે સુભાષબ્રિજ પાસે ચા પીતી વખતે મારપીટ કરી હતી. અજય સાલ્વીએ પાર્થ પાવડરને ફોન કરતાં ઉગ્ર બોલાચાલી થઈ હતી અને જાનથી મારી નાખવાની ધમકી અપાઈ હતી.

આશરે એક વર્ષ પહેલાં રાણીપ પોલીસ સ્ટેશન વિસ્તારના એક હત્યા કેસના ઠાકોર સમાજના આરોપીઓને અંકિતે જામીન પર મુક્ત કરાવવામાં મદદ કરી હોવાથી પણ બંને પક્ષો વચ્ચે જૂનું વેર ચાલતું હતું.

રેકી કર્યા બાદ ઘાતકી હુમલો

મૃતક અજય સાલ્વીને મોડી રાત્રે ફોન પર બાતમી મળી હતી કે એક ટેમ્પોમાં શંકાસ્પદ લોકો તેમની રેકી કરી રહ્યા છે. આથી પરિસ્થિતિ તપાસવા તે સુભાષબ્રિજ સર્કલ પાસે ઊભા રહ્યા હતા ત્યારે જ અગાઉથી તક જોઈને બેઠેલા હુમલાખોરોએ પાછળથી ઘાતકી હુમલો કરી દીધો હતો. હાલમાં પોલીસે ઘટનાસ્થળના સીસીટીવી ફુટેજ મેળવી, આસપાસના વિસ્તારોમાં નાકાબંધી કરીને તમામ ફરાર આરોપીઓને ઝડપી પાડવા માટે અલગ-અલગ ટીમો બનાવી સઘન શોધખોળ હાથ ધરી છે.