હેર સલૂનના કારીગરની હત્યા કેસનો આરોપી ઝડપાયો

વડોદરા,સુંદરપુરા ગામ પાસેના હેર સલૂનમાં ઘુસી કારીગરની હત્યા કરીને ભાગી જરના આરોપીને કપુરાઇ ચોકડી પાસેથી  પોલીસે ઝડપી પાડી વધુ તપાસ હાથ ધરી છે. 

સુંદરપુરા ગામ નજીક ઓર્નેટ વિલા કોમ્પલેક્સમાં આવેલી હેર સ્ટુડિયો સલૂનની દુકાનની બાજુમા કિરણ જશુભાઇ ચાવડા(રહે. ઓર્નેટ ટાઉનવિલા, સુંદરપુરા રોડ, જાંબુવા) ં કરિયાણાની દુકાન ચલાવે છે. દુકાનની આગળ સામાન રાખવાના મુદ્દે કિરણ ચાવડાને અગાઉ હેર સલૂનના કારીગરો સાથે માથાકૂટ થઇ હતી. તે ઝઘડાની અદાવત રાખી ત્રણ દિવસ  પહેલા મિતેશ દુકાનમાં હતો. ત્યારે કિરણ ચાવડા દુકાનમાં ધસી ગયો હતો.  તીક્ષ્ણ હથિયારના ઉપરાછાપરી ઘા ઝીંકી મિતેશને લોહીલુહાણ કરી  કિરણ ચાવડા ફરાર થઇ ગયો હતો. જે અંગે  કપુરાઇ  પોલીસે ગુનો દાખલ કર્યો હતો. કપુરાઇ પોલીસ આરોપીને પકડવા દોડધામ કરી રહી હતી.પરંતુ, આરોપી મોબાઇલ છોડીને ગયો હોઇ ટેકનિકલ સોર્સ કામ લાગે તેમ નહતું. જેથી, કપુરાઈ પી.આઇ. ડી.સી.રાઓલે બાતમીદારોનું નેટવર્ક સક્રિય કરી આરોપીના સંપર્ક સૂત્રો અને સંભવિત આશ્રયસ્થાનો અંગેની માહિતી એકત્રિત કરી હતી. દરમિયાન માહિતી મળી હતી કે, કપુરાઇ બ્રિજ પાસે એક વાહનમાંથી નીચે ઉતરી કિરણ ચાવડા બીજા વાહનની રાહ જોઇને ઊભો છે. જેથી,  પોલીસે ઉપરોક્ત સ્થળે જઇ તેને ઝડપી લીધો હતો.