અણીયાળી કુંડલી વચ્ચે કાર અને બાઈક અથડાતાં યુવાનનું મોત

- મૃતકના ભાઈએ કાર ચાલક વિરુદ્ધ ફરિયાદ નોંધાવી

- બે બાઇક સવાર બોટાદથી કુંડળી ગામે આવતા અકસ્માત સર્જાયો

રાણપુર તાલુકાના કુંડલી ગામે રહેતા રણજીતભાઇ ભુપતભાઈ ડાભીના મોટાભાઈ દિલીપભાઈ ભુપતભાઈ ડાભી (ઉ.વ.૪૫) ટ્રેકટરમાં ચણા ભરીને બોટાદ માર્કેટિંગ યાર્ડ ખાતે ગયા હતા. દરમિયાનમાં તેમને લેવા માટે જયેશભાઈ મોટરસાયકલ નંબર જીજે-૦૭-એએસ-૮૦૪૫ લઈને દિલીપભાઈને લેવા માટે ગયા હતા અને જયેશભાઈ દિલીપભાઈએ બાઇકમાં બેસાડી બોટાદથી કુડલી ગામ તરફ આવી રહ્યા હતા. તે દરમિયાન બોટાદ રોડ પર આવેલ અણીયાળી કુંડલી વચ્ચે સામેથી કાર નંબર જીજે-૩૩-એફ-૯૭૩૧ના ચાલકે પોતાનું વાહન પુરઝડપે અને બેફિકરાઈથી ચલાવી બાઈક સાથે અથડાવી દેતા બન્ને બાઇક સવારને ગંભીર ઇજા પહોંચતા સારવાર માટે ૧૦૮ સેમ્યુલન્સ મારફતે હોસ્પિટલે ખસેડવામાં આવ્યા હતા, જ્યાં દિલીપભાઈનું મોત નિપજ્યું હતું. આ બનાવ સંદર્ભે મૃતકના ભાઈ રણજીતભાઇએ કાર ચાલક વિરૂધ્ધ રાણપુર પોલીસ મથકમાં ફરિયાદ નોંધાવતા પોલીસે વધુ તપાસ હાથ ધરી છે.