રિક્ષાને પાછળથી ટક્કર મારીને વોંકળામાં ધકેલી દીધી
કાળદૂતની જેમ દોડતીકાર આપણી ઉપર ચડાવી દેશે તેમ લાગતા રિક્ષામાંથી કૂદકો મારી ત્રણ મુસાફરો ઉતરી ગયા; પોલીસ-ગ્રામજનોનો અટકાવવા પ્રયાસ છતાં કાર આગળ ધસી ગઇ
પડધરી પોલીસે રાદડ ગામે રહેતાં રિક્ષા ચાલક યજુરાજસિંહ શાંતુભા જાડેજા (ઉ.વ.૨૨)ની ફરિયાદ પરથી નવઘણ બાંભવા (રહે. પીયાવા, તા.ટંકારા) અને ત્રણ અજાણ્યા શખ્સો સામે ગુનો દાખલ કર્યો હતો. યજુરાજસિંહે પોલીસને જણાવ્યું કે, ગઇકાલે સાંજે તે સરપદડ ગામેથી તેના ગામનાં શિવરાજસિંહ જાડેજા અને જયપાલસિંહ જાડેજાને રિક્ષામાં બેસાડી પરત ગામ તરફ ફરી રહ્યો હતો ત્યારે સરપદડ અને રાદડ ગામની વચ્ચે બલેનો કાર તેના ગામથી પૂરપાટ વેગે સરપદડ ગામ તરફ ગઇ હતી.
તેણે પાછળ જોતાં ત્રણેય બાઇક તેની પાછળ આવતા હતા જેમણે કાર ચાલકને રોકવાનો પ્રયત્ન કરતાં ચાલકે કાર યુ-ટર્ન લઇ પૂરપાટ વેગે તેની તરફ હંકારી મૂકી હતી. આથી તેણે રિક્ષામાં બેઠેલા અન્ય બંનેને આ કાર આપડી ઉપર ચડાવી દેશે અને મારી નાંખશે આપડે રિક્ષામાંથી નીચે ઉતરી જઇએ કહેતાં ત્રણેય રિક્ષામાંથી કૂદકો મારી નીચે ઉતરી ગયા હતા. આ સમયે કાર ચાલકે રિક્ષાને પાછળથી ટક્કર મારતા રોડ નીચે હોકળાંમાં પડી ગઇ હતી. બાદમાં તે અન્ય કારમાં પોતાના ગામ પહોંચ્યા હતા.
જ્યાં ગામના પાદરમાં તેના ભાઇ સહિતનાં લોકો એકઠા થઇ ગયા હોવાથી પૂછપરછ કરતાં તેના ભાઇએ વાત કરી હતી કે સરપદડ ગામે ઇકો સાથે બલેનો કારવાળાએ અકસ્માત કર્યો હતો અને તેની સાથે માથાકુટ કરતો હતો આથી તે વચ્ચે પડીને જોતાં તે નવઘણ હતો. તેણે કેમ આવી રીતે ગાડી ચલાવે છે કોઇ મરી જાશે તો તેમ સમજાવતાં નવઘણે આજે તો મારી જ નાખવા છે બધાને કહીં બોલાચાલી કરી ચારેય આરોપીઓએ તેને ગાળો દઇ ધમકી આપી હતી. આથી પોલીસ બોલાવાઇ હતી.
થોડીવાદ બાદ આરોપીઓ કારમાં ફરી પૂરપાટ વેગે ઇટાળા ગામ તરફથી આવતી હોવાનું જાણવા મળતાં ગામલોકો અને પોલીસે તેને અટકાવવાનો પ્રયાસ કર્યો હતો. પરંતુ તે સરપદડ તરફ ચાલી ગઇ હતી. ત્યારબાદ તેને જાણ્યા મળ્યું હતું કે સરપદડના પુલ પાસે અને બસ સ્ટેન્ડ પાસે ચાલકે ત્રણેક લોકોને ઇજા પહોંચાડી હતી. એટલું જ નહીં આ કાર ચાલક આ રસ્તે બેફામ સ્પીડે ત્રણેક વખત નીકળ્યો હતો.
