શહેરમાં વીજ ગર્જના સાથે પોણો ઈંચ કમોસમી વરસાદ

- કુમુદવાડી વિસ્તારમાં છત પડી, વૃક્ષોની ડાળીઓ ધરાશાયી

- 26 કિ.મી.ની ઝડપે પવન ફૂંકાયો, માવઠાંના માહોલ વચ્ચે પણ તાપમાન દોઢ ડિગ્રી ઉંચકાયું : ઘોઘામાં પા ઈંચ કમોસમી વરસાદ ખાબક્યો

હવામાન વિભાગે કરેલી આગાહીને લઈ ભાવનગરમાં આજે બપોરના બે વાગ્યા આસપાસ વાતાવરણમાં અચાનક પલટો આવ્યો હતો. પ્રથમ સૂર્યનારાયણની હાજરી વચ્ચે છાંટા વરસ્યા બાદ ૨૬ કિ.મી.ની ઝડપે ફૂંકાયેલા પવન અને વીજળીના ગડગડાટ સાથે જોરદાર માવઠું વરસ્યું હતું. જેના કારણે માત્ર અર્ધો કલાકમાં જ ૧૬ મિ.મી. પાણી પડયું હતું. શહેરના છેવાડાના વિસ્તારમાં વરસાદનું પ્રમાણ વધું રહેતા હવામાન વિભાગમાં ૨૦ મિ.મી. વરસાદ થયાનું નોંધાયું હતું. માવઠાંના કારણે રસ્તાઓ પર પાણી ભરાયા હતા. કમોસમી વરસાદ થંભ્યા બાદ તુરંત ઉઘાડ નીકળ્યો હતો. વરસાદી માવઠાંના માહોલ વચ્ચે પણ મહત્તમ તાપમાન દોઢ ડિગ્રી ઉંચકાઈને ૩૫.૧ ડિગ્રીએ પહોંચી ગયું હતું. કુમુદવાડી વિસ્તારમાં આવેલા એક કોમ્પલેક્ષની છત પડતા લોકોમાં નાસભાગ મચી હતી. સદ્નસીબે કોઈ ઈજા કે જાનહાનિ થવા પામી ન હતી. ભાવનગર ઉપરાંત ઘોઘામાં પણ માવઠાંનો માર પડયો હતો. ઘોઘામાં પાંચ મિ.મી. કમોસમી વરસાદ થયાનું ફ્લડ કંટ્રોલ વિભાગમાં નોંધાયું છે.