ધોરણ-8નાે વિદ્યાર્થી ઘરમાંથી રૃ.55,000 લઇ ફરાર, મિત્રને કહ્યું,સ્ટેશન મૂકીજા..બોમ્બે જાઉં છુ

 વડોદરાઃ ટીનેજર્સ વિદ્યાર્થીઓ દ્વારા રીલ્સ, સિરિયલ કે ફિલ્મ જોઇને અવિચારી કૃત્ય આચરવાને કારણે પરિવારજનો પરેશાન થઇ જતા હોવાના અવારનવાર કિસ્સા  બનતા હોય છે.આવા જ એક કિસ્સામાં સામાન્ય પરિવારનો ધોરણ-૮નો વિદ્યાર્થી ઘરમાંથી રોકડ લઇને ફરાર થઇ જતાં આખું પરિવાર હેરાન થઇ ગયું છે.

છાણી વિસ્તારમાં રહેતી નોકરિયાત મહિલાના પતિનું બે વર્ષ પહેલાં નિધન થતાં બંને સંતાનોને પેટે પાટા બાંધીને અભ્યાસ કરાવી રહી છે.જેમાં એક પુત્ર ધોરણ-૮માં અભ્યાસ કરી રહ્યો છે.આ વિદ્યાર્થી છેલ્લા કેટલાક સમયથી સોશ્યલ મીડિયા પર પણ એક્ટિવ હતો.

મહિલાના એક પરિવારજને તાજેતરમાં મકાન લીધું હોવાથી તેમને મદદ કરવા માટે મહિલાએ ભેગા કરેલા રૃ.૭૦ હજાર પુત્રને રાખવા આપ્યા હતા.પુત્રએ આ રકમ તિજોરીમાં મૂકી હતી.તા.૯મીએ રાત્રે મહિલા નોકરીએથી પરત આવી ત્યારે પુત્ર ઘરમાં નહતો.જેથી તેણે ફોન કરતાં પુત્રનો મોબાઇલ પણ બંધ આવતો હતો.મહિલાએ તપાસ કરતાં તિજોરીમાં માત્ર રૃ.૧૫હજાર જ મળ્યા હતા.

મહિલાને શંકા જતાં સબંધીઓ મારફતે તપાસ કરાવી હતી.જે દરમિયાન પુત્રના મિત્ર પાસે ચોંકાવનારી વિગતો મળી હતી.મિત્રએ કહ્યું હતું કે,વિદ્યાર્થી મને રાત્રે ૧૦ વાગે  મળ્યો હતો અને અઠવાડિયા માટે કપડાં લેવા મુંબઇ જાઉંં છું,બહુ મોડું થઇ ગયું છે..તેમ કહી છાયાપુરી સ્ટેશને છોડી જવા માટે કહેતાં હું તેને બાઇક પર મૂકી આવ્યો હતો.જેથી માતાએ છાણીના પીઆઇ આરએલ  પ્રજાપતિને જાણ કરતાં તેમણે બે ટીમો બનાવી તપાસ શરૃ કરી છે.

4 મહિના પહેલાં સમામાં ધોરણ-૧૦નો વિદ્યાર્થી ઘરમાંથી

રૃપિયા 3 લાખ લઇ કાર ભાડે કરી ગોવા ચાલ્યો ગયો હતો

ગોવાની હોટલમાં રૃમ બૂક કરાવ્યો હતો, પોલીસે બીચ પરથી શોધી કાઢ્યો હતો

ચાર મહિના પહેલાં પણ સમા રોડ પર રહેતો ધોરણ-૧૦નો વિદ્યાર્થી ઘરમાંથી રૃ.૩ લાખ લઇને ફરાર થઇ ગયો હોવાનો બનાવ બન્યો હતો.

ફ્લેટમાં રહેતો વિદ્યાર્થી રાત્રે પરિવાર સાથે સૂવા માટે બેડરૃમમાં ગયો હતો,પરંતુ સવારે દેખાયો નહતો.જેથી તેની માતા અને બહેને શોધતાં સીસીટીવીમાં મધરાતે બેગ લઇને જતો નજરે પડયો હતો.સમા પોલીસે ટીમો બનાવીને તપાસ કરતાં તેનું લોકેશન ગોવા દેખાયું હતું.

પોલીસની ટીમ ગોવા પહોંચી હતી અને બીચ પરથી વિદ્યાર્થીને શોધી કાઢ્યો હતો. વિદ્યાર્થીએ કબૂલ્યું હતું કે,ઘેરથી ૩ લાખ લઇને નીકળ્યા બાદ કાર ભાડે કરી મુંબઇ અને ત્યાંથી ગોવા ગયો હતો.જ્યાં તે એક હોટલમાં રૃમમાં રોકાયો હતો.

મિત્રોને અનફોલો કરી દીધા,મૂંઝવણમાં હતો

પોલીસે કહ્યું હતું કે,છાણીનો ગૂમ થયેલો વિદ્યાર્થી સોશ્યલ મીડિયા પર એક્ટિવ હતો. કેટલાક સમયથી તેણે મિત્રોને મળવાનું ઓછું કરી દીધું હતું અને મૂંઝવણમાં હોય તેમ લાગતો હતો.વડોદરા છોડયા બાદ તેણે મિત્રોને અનફોલો પણ કરી દીધા હતા.