વેરાવળના શખ્સોએ સ્ક્રેપનો માલ ખરીદ્યા બાદ ચેક આપ્યો હતો
ચેકની બમણી રકમ દંડ પેટે કોર્ટમાં જમા કરાવવા હુકમ
ભાવનગર - વેરાવળના બે શખ્સને ચેક બાઉન્સના કેસમાં બે-બે વર્ષ કેદની સજાનો હુકમ અને ચેકની બમણી રકમ દંડ પેટે કોર્ટમાં જમા કરાવવા હુકમ કરાયો છે.
રાજકોટના સાપર (વેરાવળ), ગેલેક્ષી બેરિંગ, નેશનલ હાઈવે નં.૮/બી, સર્વે નં.૨૫૨, પ્લોટ નં.૬માં આવેલ શ્રી રામદેવ ટેકનોકાસ્ટ પ્રા.લિ.ના ભાગીદાર પરેશ મોહનભાઈ અને રોનક ગોવિંદભાઈ નામના શખ્સોએ ભાવનગરમાં અલકા ટોકીઝ પાસે આવેલ ગુજરાત ઓક્સિઝનના પ્રોપરાઈટર નાસીરભાઈ રજાકભાઈ ગુડ્ડા પાસેથી લોખંડ અને સ્ટીલનો સ્ક્રેપ ખરીદ્યા બાદ બાકીની રકમનો આપેલો ચેક બાઉન્સ થયો હતો. જે અંગે નાસીરભાઈએ તેમના વકીલ મારફત કોર્ટમાં ફરિયાદ નોંધાવી હતી. આ અંગેનો કેસ ભાવનગરના બીજા એડી. ચીફ જ્યુડી. મેજિ. (સ્પે. નેગો. કોર્ટ) જે.પી.પ્રજાપતિની કોર્ટમાં ચાલી જતાં રજૂ થયેલા આધાર-પુરાવા, દલીલો વગેરેને ધ્યાને રાખી કોર્ટે બન્ને આરોપીને બે-બે વર્ષની સજા, ચેકની બમણી રકમ દંડ પેટે કોર્ટમાં જમા કરાવવા અને ફરિયાદીને ચેકની રકમ નવ ટકા વાર્ષિક વ્યાજ સાથે ચૂકવવા તેમજ દંડની રકમ ન ભરે તો વધુ છ માસની સાદી કેદ ભોગવવા હુકમ કર્યો છે.
