ઈન્સ્ટાગ્રામ મારફત બંને વચ્ચે પ્રેમ પાંગર્યો હતો
વીરપુર પોલીસે બંનેને સુરતથી શોધી લીધા, કિશોરનો કબજો તેના વાલીઓને સોંપી આપ્યો
રાજકોટ: વીરપુરમાં ઉલટી ગંગા જેવો કિસ્સો પ્રકાશમાં આવ્યો છે. જેમાં ર૧ વર્ષની યુવતી સામે ૧૭ વર્ષના કિશોરને ભગાડી જવા અંગે ગુનો નોંધાયો છે. વીરપુર પોલીસે બંનેને સુરતથી શોધી કાઢયા હતા.
પોલીસ પાસેથી પ્રાપ્ત વિગત મુજબ વીરપુરમાં રહેતાં ૧૭ વર્ષના કિશોર અને મૂળ મધ્યપ્રદેશની ર૧ વર્ષની યુવતી ઈન્સ્ટાગ્રામથી એકબીજાના સંપર્કમાં આવ્યા હતા. ત્યાર પછી બંને વચ્ચે પ્રેમ પાંગર્યો હતો. આખરે બંનેએ ભાગી જવાનું નકકી કર્યું હતું. યુવતી હાલ બાબરા પંથકમાં રહેતી હતી. જયાંથી તે ગોંડલ આવી હતી. જયારે વીરપુરનો કિશોર પણ ગોંડલ પહોંચ્યો હતો. ગોંડલથી બસમાં બેસી બંને ભાગી ગયા હતા.
યુવતી કિશોર કરતાં મોટી હોવાથી તેના વિરૂધ્ધ વીરપુર પોલીસે કિશોરને ભગાડી જવા અંગે અપહરણનો ગુનો દાખલ કર્યો હતો. ગઈ તા.૬નાં રોજ આ અંગે ફરિયાદ નોંધાયા બાદ વીરપુર પોલીસે બંનેની શોધખોળ શરૂ કરી હતી. આખરે બંને સુરતથી મળી આવતાં વીરપુર લઈ આવી કિશોરનો કબજો તેના વાલીઓને સોંપી દીધો હતો. જયારે યુવતીની પોલીસે અપહરણના ગુનામાં ધરપકડ કરી હતી.
આ પ્રકારના મોટાભાગના કિસ્સાઓમાં પ્રેમી સામે ગુનો નોંધાતો હોય છે. જયારે આ કિસ્સામાં પ્રેમિકા સામે ગુનો નોંધાયો છે. આ જ કારણથી આ કિસ્સો અપવાદરૂપ બની ગયો છે.
