Jamnagar Corporation : જામનગર મહાનગરપાલિકા, સિક્કા નગરપાલિકા, જામનગર જિલ્લા પંચાયત તથા જિલ્લાની 6 તાલુકા પંચાયતોની સામાન્ય ચૂંટણી તા.26/04/2026ના રોજ યોજાનાર હોઈ જિલ્લા તંત્ર દ્વારા મુક્ત, ન્યાયી અને શાંતિપૂર્ણ મતદાન સુનિશ્ચિત કરવા વિવિધ મહત્વપૂર્ણ જાહેરનામાઓ પ્રસિદ્ધ કરવામાં આવ્યા છે.
ચૂંટણી દરમિયાન કાયદો અને વ્યવસ્થા જળવાઈ રહે તે માટે હથિયારબંધી ફરમાવવામાં આવી છે તેમજ પરવાનેદારોને હથિયારો જમા કરાવવાનો આદેશ આપવામાં આવ્યો છે. ઉપરાંત, જાહેર સ્થળોએ હથિયાર સાથે સરઘસ, સભા કે ફરવા પર પ્રતિબંધ મૂકવામાં આવ્યો છે.
મતદાનના દિવસે મતદાન મથકો અને આસપાસના વિસ્તારોમાં ખાસ પ્રતિબંધો લાગુ રહેશે. મતદાન મથકની અંદર તથા 100 મીટરના વિસ્તારમાં મોબાઈલ ફોન સહિતના કોમ્યુનિકેશન સાધનો લઈ જવા અને ઉપયોગ કરવા ઉપર પ્રતિબંધ રહેશે. તેમજ 200 મીટરના વિસ્તારમાં ચૂંટણી પ્રચાર, પેમ્ફલેટ વિતરણ અને પ્રતિકો દર્શાવવાનો પણ પ્રતિબંધ રહેશે.
ચૂંટણી પ્રચાર માટે ઉપયોગમાં લેવાતા વાહનોની નોંધણી ફરજિયાત બનાવવામાં આવી છે અને પરમિટ વગર કોઈ વાહનનો ઉપયોગ કરી શકાશે નહીં. ઈલેક્ટ્રોનિક મીડિયામાં પ્રચાર માટે પૂર્વ મંજૂરી લેવી જરૂરી રહેશે તેમજ કેબલ નેટવર્ક અને મીડિયા સંસ્થાઓએ દૈનિક પ્રસારણનો રેકોર્ડ સબમિટ કરવાનો રહેશે.
જાહેર અથવા ખાનગી મિલકતો પર માલિકની મંજૂરી વિના બેનર, પોસ્ટર કે લખાણ કરવાનું મનાઈ કરવામાં આવ્યું છે. ચૂંટણીલક્ષી છાપકામમાં મુદ્રક અને પ્રકાશકની વિગતો દર્શાવવી ફરજિયાત રહેશે.
ચૂંટણી સમયગાળા દરમિયાન ચારથી વધુ વ્યક્તિઓના એકત્ર થવા પર પ્રતિબંધ મૂકવામાં આવ્યો છે (કેટલાક અપવાદો સિવાય). મતદાનના 48 કલાક પૂર્વે તથા મતગણતરીના દિવસે જિલ્લામાં ‘ડ્રાય ડે’ જાહેર કરવામાં આવ્યો છે, જેમાં દારૂના વેચાણ અને વપરાશ પર પ્રતિબંધ રહેશે.
જિલ્લા તંત્ર દ્વારા નાગરિકોને આ તમામ નિયમોનું પાલન કરી ચૂંટણી પ્રક્રિયાને શાંતિપૂર્ણ અને સુવ્યવસ્થિત બનાવવા સહકાર આપવા અપીલ કરવામાં આવી છે. કોઈપણ જાહેરનામાનો ભંગ કરનાર સામે ભારતીય ન્યાય સંહિતા-2023 મુજબ કાયદેસરની કાર્યવાહી હાથ ધરવામાં આવશે.
