બરડા અભયારણ્યની જંગલ સફારી દરમિયાન 11 સિંહો સાથે જોવા મળ્યા

2 મોટા અને 9 બાળ સિંહોને નિહાળી પ્રવાસીઓ રોમાંચિત : જંગલ સફારી શરૂ થયા બાદ પ્રથમ વખત સમૂહમાં આટલી મોટી સંખ્યાવાળો સિંહ પરિવાર જોવા મળ્યો

પોરબંદર, : બરડા ડુંગરમાં જ્યાં વનવિભાગ દ્વારા એક વર્ષ પૂર્વે જંગલ સફારીની શરૂઆત કરવામાં આવી હતી ત્યાં આ દિવાળી તથા નૂતનવર્ષના તહેવારો દરમ્યાન જંગલસફારીની મજા માણવા માટે વિશાળ સંખ્યામાં પર્યટકો ઉમટી રહ્યા છે ત્યારે પહેલી વખત જંગલ સફારીના રૂટ ઉપર 11 સિંહો સમૂહમાં જોવા મળતાં સહેલાણીઓ પણ રોમાંચિત બની ગયા હતાં.

બરડા અભ્યારણ્ય રૂટના અજમાપાટ નેશ નજીક સહેલાણીઓને સમૂહમાં 11 જેટલા સિંહ જોવા મળતા તેઓ રોમાંચિત થઈ ગયા હતાં. કુદરતના ખોળે વિહરતા 9 બાળસિંહ અને સિંહ સિંહણની જોડી મળી કુલ 11 સાવજોને જોઈને તેને કચકડે કેદ કરવા માટે સહેલાણીઓએ પડાપડી કરી હતી. રેન્જ ફોરેસ્ટ ઓફિસરે જણાવ્યું હતું કે, બરડા ડુંગરમાં જંગલ સફારી શરૂ થયા પછી પ્રથમ વખત સમૂહમાં આટલી મોટી સંખ્યા સાથે સિંહ પરિવાર જોવા મળ્યો છે.