GSRTCની મોબાઇલ એપ પર બુકિંગનો નવો રેકોર્ડ, એક જ દિવસમાં 88,626 ટિકિટો થઈ બુક

GSRTC Mobile App: ગુજરાત રાજ્ય માર્ગ વાહનવ્યવહાર નિગમ (GSRTC)ની મોબાઇલ એપ પરથી ટિકિટ બુકિંગમાં નવો વિક્રમ સર્જાયો છે. 26 ઓગસ્ટ, 2026ના રોજ એક જ દિવસમાં 88,626 ટિકિટનું બુકિંગ થયું હતું. આ અત્યાર સુધીનું GSRTC મોબાઇલ એપ મારફતે એક દિવસમાં થયેલું સૌથી વધુ ઓનલાઇન બુકિંગ છે.

આ પહેલાં 4 નવેમ્બર, 2024ના રોજ 85,247 બુકિંગ સાથે સૌથી વધુ બુકિંગનો રેકોર્ડ હતો. એટલે નવા રેકોર્ડમાં જૂના રેકોર્ડ કરતાં 3,379 બુકિંગ એટલે કે આશરે 4%નો વધારો નોંધાયો છે. જ્યારે 24મી ઓક્ટોબર, 2025ના રોજ થયેલા 85,205 બુકિંગની સરખામણીએ નવા રેકોર્ડમાં 3,421 બુકિંગનો વધારો થયો છે.

ટોપ-10માં 2026ના બે દિવસ

GSRTCના આંકડા મુજબ મોબાઇલ એપ પરથી એક દિવસમાં સૌથી વધુ બુકિંગના ટોપ-10માં 2026ના બે દિવસ સામેલ છે. 26 ઓગસ્ટે 88,626 સાથે પ્રથમ અને 25 ઓગસ્ટે 76,258 બુકિંગ સાથે આઠમું સ્થાન મેળવ્યું છે. બાકીના મોટા ભાગના રેકોર્ડ 2024 અને 2025ના તહેવારી સમયગાળાના છે.

તહેવારો દરમિયાન ઓનલાઇન બુકિંગમાં ઉછાળો

રક્ષાબંધન સહિતના તહેવારો અને રજાઓ દરમિયાન મુસાફરો મોટી સંખ્યામાં અગાઉથી બસ ટિકિટ બુક કરતા હોવાથી મોબાઇલ બુકિંગમાં નોંધપાત્ર વધારો જોવા મળે છે. GSRTC દ્વારા મોબાઇલ અને ઓનલાઇન માધ્યમથી રિઝર્વેશનની સુવિધા આપવામાં આવે છે. સત્તાવાર ઓનલાઇન વ્યવસ્થામાં પ્રીમિયમ સહિતની વિવિધ બસ સેવાઓ માટે એડવાન્સ બુકિંગની સુવિધા ઉપલબ્ધ છે.

GSRTC મોબાઇલ બુકિંગના ટોપ-10 રેકોર્ડ

•26-08-2026 - 88,626 બુકિંગ
•04-11-2024 - 85,247 બુકિંગ
•24-10-2025 - 85,205 બુકિંગ
•25-10-2025 - 82,712 બુકિંગ
•03-11-2024 - 82,233 બુકિંગ
•23-10-2025 - 82,169 બુકિંગ
•05-11-2024 - 80,700 બુકિંગ
•25-08-2026 - 76,258 બુકિંગ
•26-10-2025 - 76,066 બુકિંગ
•09-11-2024 - 75,423 બુકિંગ

ડિજિટલ બુકિંગ તરફ મુસાફરોનો વધતો ઝોક: એક જ દિવસમાં 88 હજારથી વધુ ટિકિટનું મોબાઇલ એપ મારફતે બુકિંગ થવું દર્શાવે છે કે GSRTCના મુસાફરોમાં પરંપરાગત બુકિંગની સાથે ડિજિટલ માધ્યમનો ઉપયોગ સતત વધી રહ્યો છે. GSRTCની ઓનલાઇન વ્યવસ્થામાં મુસાફરોને ટિકિટ બુકિંગ, સેવા પસંદગી અને રિઝર્વેશનની સુવિધા ઉપલબ્ધ છે.