ઓસ્કાર વિજેતા હોલિવૂડ અભિનેત્રી ડાએન કીટનનું નિધન, 79 વર્ષની વયે લીધા અંતિમ શ્વાસ

Hollywood Actress Diane Keaton Passed Away: ઓસ્કાર વિજેતા અને હોલિવૂડની દિગ્ગજ અભિનેત્રી ડાએન કીટનનું 79 વર્ષની વયે નિધન થયું છે. અહેવાલો અનુસાર, તેમણે કેલિફોર્નિયામાં અંતિમ શ્વાસ લીધા હતા. તેમના પરિવારે આ દુઃખના સમયમાં ગોપનીયતા જાળવવાની વિનંતી કરી છે અને નિધનના કારણ વિશે વધુ કોઈ વિગતો હજુ સુધી જાહેર કરવામાં આવી નથી.

ડાએન કીટનને બાળપણથી જ થિયેટર અને ગાયન પ્રત્યે આકર્ષણ હતું

હોલિવૂડના ઇતિહાસમાં એક પ્રતિષ્ઠિત નામ, ડાએન કીટનનો જન્મ જાન્યુઆરી 1946માં લોસ એન્જલસમાં થયો હતો. તેમનું સાચું નામ ડાએન હોલ હતું. જો કે, તેમનો પરિવાર ફિલ્મ ઉદ્યોગ સાથે સંકળાયેલો નહોતો, તેમ છતાં ડાએન કીટનને બાળપણથી જ થિયેટર અને ગાયન પ્રત્યે વિશેષ આકર્ષણ હતું. તેમણે ન્યૂ યોર્કમાં સેનફોર્ડ મેઈસનર પાસેથી અભિનયની તાલીમ લીધી, જેમણે તેમને માનવ વર્તનની જટિલતાઓને પડદા પર ઉતારવાની કળા શીખવી.

કારકિર્દીની શરૂઆત અને સિનેમેટિક યોગદાન

ડાએન કીટને વર્ષ 1968માં બ્રોડવે પરના નાટકો "હેર" અને "પ્લે ઈટ અગેઈન, સેમ"માં અભિનય કરીને પોતાની કારકિર્દીની શરૂઆત કરી હતી, જેના માટે તેમને ટોની એવોર્ડ માટે નામાંકિત કરવામાં આવ્યા હતા. તેમનો ફિલ્મી પ્રવેશ 1970માં "લવર્સ એન્ડ અધર સ્ટ્રેન્જર્સ"થી થયો, પરંતુ તેમને મુખ્ય સફળતા ફ્રાન્સિસ ફોર્ડ કોપોલાની માસ્ટરપીસ ફિલ્મ "ધ ગોડફાધર" (1972)માં મળી, જે અત્યાર સુધીની સૌથી પ્રિય ફિલ્મોમાંની એક માનવામાં આવે છે.

આ પણ વાંચો: અમિતાભ બચ્ચને મુંબઈમાં રૂ. 6.6 કરોડના 3 નવા પ્લોટ ખરીદ્યા, જન્મદિવસ પહેલાં જ અલીબાગમાં કર્યું હતું રોકાણ

હોલિવૂડની અભિનેત્રી ડાએન કીટને વર્ષ 1970ના દાયકામાં દિગ્દર્શક વુડી એલનની ઘણી નોંધપાત્ર ફિલ્મોમાં કામ કર્યું, જેમાં "સ્લીપર", "લવ એન્ડ ડેથ", "ઇન્ટિરિયર્સ", "મેનહટન", "મેનહટન મર્ડર મિસ્ટ્રી" અને "પ્લે ઈટ અગેઇન, સેમ" જેવી ફિલ્મોનો સમાવેશ થાય છે. જોકે, તેમની કારકિર્દીની સૌથી યાદગાર અને સીમાચિહ્નરૂપ ભૂમિકા વુડી એલનની જ ફિલ્મ "એની હોલ" (1977) માં હતી. આ ભૂમિકા માટે ડાએન કીટનને ઓસ્કાર એવોર્ડ મળ્યો હતો.

ડાએન કીટને તેમની કારકિર્દી દરમિયાન કુલ ચાર ઓસ્કાર નોમિનેશન મેળવ્યા હતા, જેમાં "એની હોલ" માટેનો તેમનો પહેલો અને એકમાત્ર એવોર્ડ હતો.