'કામ નહીં મળે તો...?' આ એક ડરના લીધે દરેક ફિલ્મને હા પાડી દેતો હતો સ્ટાર કિડ, 26 વર્ષ પછી થયો પસ્તાવો

Abhishek Bachchan On Working in Films: બોલિવૂડના મહાનાયક અમિતાભ બચ્ચનના પુત્ર અભિષેક બચ્ચને પોતાની કરિયરની શરૂઆત એક ફ્લોપ ફિલ્મથી કરી હતી. ત્યારબાદ તેણે ઘણી એવી ભૂમિકાઓ ભજવી, જે કદાચ તેણે ન કરવી જોઈતી હતી. એક્ટિંગની દુનિયામાં 26 વર્ષ પૂરા કરી ચૂકેલા અભિષેકને તે સમયે એવો જ ડર સતાવતો હતો કે ભવિષ્યમાં કામ મળશે કે નહીં. આથી જે પણ કામ મળતું, તે સ્વીકારી લેતો હતો.

સદીના મહાનાયક અમિતાભ બચ્ચન અને અભિનય ક્ષેત્રે મોટું નામ ધરાવતા જયા બચ્ચનના પુત્ર હોવાને કારણે, ઘણા લોકોને એવું લાગતું હતું કે અભિષેક બચ્ચનની શરૂઆત ખૂબ જ સરળ રહી હશે. કેટલાક લોકો વિચારતા હતા કે તેને ખૂબ જ આસાનીથી ફિલ્મો મળી જતી હશે, પરંતુ વાસ્તવિકતામાં એવું નહોતું. ખુદ અભિષેક બચ્ચનનું કહેવું છે કે કરિયરની શરૂઆતમાં કામ ન મળવાના ડરથી જે પણ ઓફર આવતી, તે હા પાડી દેતો હતો. જોકે, હવે તે આ ભૂલનું પુનરાવર્તન કરવા માગતો નથી.

કરિયરની શરૂઆતમાં જોયો ભારે ઉતાર-ચઢાવ
છેલ્લા 26 વર્ષથી અભિષેક બચ્ચન ઇન્ડસ્ટ્રીમાં સક્રિય છે. પોતાની કરિયરની શરૂઆતમાં તેણે ઘણા ઉતાર-ચઢાવ જોયા છે. ઘણી ફિલ્મોમાં તેણે સપોર્ટિંગ કેરેક્ટર પણ પ્લે કર્યા છે. હવે આટલા વર્ષો પછી તેણે ખુલાસો કર્યો છે કે શરૂઆતમાં તેને આગામી પ્રોજેક્ટ મળશે કે નહીં તેની ભારે ચિંતા રહેતી હતી.
અભિષેક બચ્ચને બોલિવૂડમાં પોતાના કરિયરની શરૂઆત કરીના કપૂર સાથે ફિલ્મ 'રિફ્યુજી'થી કરી હતી. પરંતુ તેની આ ડેબ્યૂ ફિલ્મ બોક્સ ઓફિસ પર કોઈ ખાસ કમાલ બતાવી શકી નહોતી. તાજેતરમાં જ તેણે પોતાના શરૂઆતના દિવસોને યાદ કર્યા છે. તેનું કહેવું છે કે ડેબ્યૂ સમયે તેને સૌથી મોટી ચિંતા એ વાતની હતી કે ઇન્ડસ્ટ્રી તેને સ્વીકારશે કે નહીં અને નવું કામ મળશે કે નહીં. આ જ કારણે તે સમયે જે પણ ફિલ્મો ઓફર થતી, તે સાઈન કરી લેતો હતો.

કામ કરવાની શૈલીમાં કર્યો મોટો ફેરફાર
તાજેતરમાં જ અભિષેક બચ્ચને એક ઈન્ટરવ્યુમાં ખુલાસો કર્યો છે કે હવે તેણે કામ કરવાની પોતાની પેટર્ન સંપૂર્ણપણે બદલી નાખી છે. હવે તે કેમેરા સામે ઘણો કમ્ફર્ટેબલ ફીલ કરે છે, જ્યારે શરૂઆતમાં તે ખૂબ જ ગભરાયેલો રહેતો હતો. તેનું કહેવું છે કે હવે તે સમજી ગયો છે કે તેના માટે કયું કામ યોગ્ય છે, કઈ ફિલ્મો માટે હા પાડવી જોઈએ અને કઈ સ્ક્રિપ્ટ રિજેક્ટ કરવી જોઈએ.

અભિષેક બચ્ચને પોતાની કરિયરમાં ઘણા એવા પાત્રો ભજવ્યા છે જે લોકોના દિલમાં વસી ગયા છે, જેમાં 'ગુરુ' જેવી શાનદાર ફિલ્મનો સમાવેશ થાય છે. આગામી સમયમાં તે શાહરૂખ ખાનની બહુપ્રતીક્ષિત ફિલ્મ 'કિંગ'માં જોવા મળશે. આ ફિલ્મમાં તેના સિવાય સુહાના ખાન, દીપિકા પાદુકોણ, રાની મુખરજી, અરશદ વારસી અને અક્ષય ઓબેરોય પણ મહત્ત્વની ભૂમિકામાં નજરે પડશે.