સલમાન બાદ હવે આમિર ખાનને લોરેન્સ બિશ્નોઈ ગેંગની ધમકી, ગૌરી સાથેના લગ્નને ગણાવ્યા 'લવ જિહાદ'

Amir Khan Death Threat : બોલિવૂડ સુપરસ્ટાર સલમાન ખાન બાદ હવે અભિનેતા આમિર ખાન પણ લોરેન્સ બિશ્નોઈ ગેંગના નિશાના પર આવ્યા છે. શનિવારે લોરેન્સ બિશ્નોઈ ગેંગ તરફથી એક ધમકીભર્યો પત્ર અને ઓડિયો મેસેજ જાહેર કરવામાં આવ્યો છે. આ પત્રમાં ગેંગના સભ્યો આરઝૂ બિશ્નોઈ અને ટાયસન બિશ્નોઈના નામ લખેલા છે. પત્રમાં આમિર ખાન અને ગૌરી સ્પ્રેટના લગ્નને 'લવ જેહાદ' ગણાવીને અભિનેતાને ગંભીર પરિણામો ભોગવવાની અને પાઠ ભણાવવાની ધમકી આપવામાં આવી છે.

ધમકીભર્યા પત્રમાં સંસ્કૃતિ અને દેશનો ઉલ્લેખ
ગેંગ દ્વારા જાહેર કરાયેલા પત્રમાં આરોપ લગાવવામાં આવ્યો છે કે, "આમિર ખાન જેવા લોકો સ્ટારડમના નામે આપણા દેશમાં લવ જેહાદને પ્રોત્સાહન આપી રહ્યા છે, જે અમારી સંસ્કૃતિ અને દેશ બંનેની વિરુદ્ધ છે. અમે આ પ્રકારના કૃત્યને બિલકુલ સહન નહીં કરીએ." ધમકી આપનારાઓએ ચેતવણીના સ્વરમાં કહ્યું છે કે જે કોઈ પણ આવી બાબતોને પ્રોત્સાહન આપશે, તેને ગેંગ પોતાના અંદાજમાં ખૂબ જ જલ્દી જવાબ આપશે અને તેની 'શ્વાસ દબાવી દેવામાં આવશે'.

રાજસ્થાનના રાજકારણીઓને પણ આખરી ચેતવણી
આમિર ખાન ઉપરાંત આ પત્રમાં રાજસ્થાનના શ્રીગંગાનગરમાં બનેલી એક માસૂમ બાળકી પરના બળાત્કારના કેસનો પણ ઉલ્લેખ કરવામાં આવ્યો છે. ગેંગે આરોપ લગાવ્યો છે કે આ મામલે સ્થાનિક પ્રશાસન પોતાની કામગીરી બરાબર કરી રહ્યું છે, પરંતુ કેટલાક રાજકીય નેતાઓ હસ્તક્ષેપ કરીને નરાધમોને બચાવવાનો પ્રયાસ કરી રહ્યા છે. ગેંગે આવા નેતાઓને આ પહેલી અને છેલ્લી ચેતવણી આપતા કહ્યું છે કે જો આરોપીઓ કાયદાની સજાથી બચી જશે, તો ગેંગ તેમને પોતાની રીતે સજા કરશે.