સૈફ અલીની કબૂલાત સતત સિક્યોરિટી સાથે ફરવું મને ન ફાવે

• 'મારા પર ગંભીર હુમલો થયો તે પછી સમગ્ર પરિસ્થિતિ બદલાઇ ગઇ છે…'

હિન્દી ફિલ્મ જગતમાં એક તબક્કે જબરો ડર અને ભય ફેલાઈ ગયો હતો. કેટલાક અસામાજિક તત્વો દ્વારા અમુક અભિનેતાઓ, નિર્માતાઓ અને દિગ્દર્શકો પર હુમલા થયા હતા અને તેમને જાતજાતની ધમકીઓ મળતી હતી. હજી એકાદ વર્ષ પહેલાં ૨૦૨૫માં સૈફ અલી ખાન પર વહેલી સવારે તેના જ ઘરમાં હુમલો થયો હતો. એક માથાભારે અજાણ્યા માણસે છરીથી સૈફ અલી ખાન પર હુમલો કરીને તેને લોહીલુહાણ કરી નાખ્યો હતો. આ ઘટનાથી બોલિવુડમાં ફરીથી ભયનું લખલખું પ્રસરી ગયું હતું.
આ ઘટનાને યાદ કરતાં કહે છે, 'ખરું કહું તો મારા પર થયેલા હુમલાથી અમારા સમગ્ર પરિવારમાં ભય અને ચિંતાનો માહોલ છવાઈ ગયો હતો. છરીના ઊંડા ઘા વાગ્યા હોવાથી મારે મુંબઈની હોસ્પિટલમાં લાંબી સારવાર લેવી પડી હતી. હું આમ તો મારી અંગત સુરક્ષા માટે સુરક્ષાકર્મીઓનો મોટો કાફલો રાખવામાં માનતો નથી. હું તો એક સામાન્ય નાગરિકની જેમ નચિંત થઈને જીવવા ટેવાયેલો માણસ છું. જો સતત કડક સુરક્ષા કવચમાં ઘેરાયેલો રહું, તો એક સાદા માણસની જેમ ન મુક્તપણે હરીફરી શકું કે ન જિંદગીનો આનંદ માણી શકું.'
તે આગળ ઉમેરે છે, 'આમ છતાં, પેલા ગંભીર બનાવ બાદ હું દ્રઢપણે માનું છું કે મારી અને મારા પરિવારની સુરક્ષા માટે સચોટ વ્યવસ્થા હોવી અનિવાર્ય છે. હું મારી જાતને અત્યંત નસીબદાર ગણું છું કે તે જીવલેણ હુમલામાંથી હું હેમખેમ બચી ગયો. એમ કહો કે એક મોટી ઘાત ટળી ગઈ.'
ફિલ્મ 'પરંપરા' (૧૯૯૩)થી બોલિવુડમાં પદાર્પણ કરનારો સૈફ અલી ખાન કહે છે, 'મારું કુટુંબ મોટું છે. મારાં ચાર સંતાનો છે - પહેલી પત્ની અમૃતા સિંહ સાથેનાં લગ્નથી સારા અલી ખાન અને ઇબ્રાહિમ, જ્યારે કરીના કપૂર સાથેના લગ્નથી તૈમૂર અને જેહ. આમ ત્રણ પુત્રો અને એક પુત્રી સહિત સમગ્ર પરિવારની સલામતી માટે કાયમી અને નક્કર વ્યવસ્થા હોવી જરૂરી છે. સારા અને ઇબ્રાહિમ તો હવે પુખ્ત વયનાં થઈ ગયાં છે, પણ તૈમૂર અને જેહ હજી બહુ નાનાં હોવાથી તેમનો ઉછેર સંપૂર્ણપણે સલામત વાતાવરણમાં થાય તે અત્યંત જરૂરી છે.'
'યે દિલ્લગી', 'મૈં ખિલાડી તૂ અનાડી', 'કચ્ચે ધાગે', 'દિલ ચાહતા હૈ', 'કલ હો ના હો', 'રેસ', 'રેસ ટુ', 'ઓમકારા' અને 'તાન્હાજી' જેવી યાદગાર ફિલ્મોમાં વૈવિધ્યસભર પાત્રો ભજવનારો સૈફ અલી ખાન એક રસપ્રદ અંગત કબૂલાત કરતાં કહે છે, 'ખરું કહું તો હું સ્વભાવે થોડો અંતર્મુખી છું. મને એકાંત વધુ ગમે છે. ખાસ કરીને શૂટિંગ દરમિયાન સેટ પર સાથી કલાકારો સાથે ધમાલ-મસ્તી કરવાને બદલે હું એક ખૂણામાં શાંતિથી બેસવાનું વધુ પસંદ કરું છું. આમ છતાં, બોલિવુડમાં સૌ સાથે મારા ખૂબ સારા સંબંધો છે. ઇન્ડસ્ટ્રીના 'ખિલાડીકુમાર' અક્ષય જેવા કેટલાક ખાસ મિત્રો પણ છે. મેં અને અક્ષયે અત્યાર સુધીમાં સાત ફિલ્મોમાં સાથે કામ કર્યું છે અને હવે અમે બંને નવી ફિલ્મ 'હૈવાન'માં ફરી સાથે સ્ક્રીન શેર કરી રહ્યા છીએ, જેમાં અક્ષય ખલનાયકની ભૂમિકા ભજવી રહ્યો છે.'
સમાપનમાં તે સ્મિત સાથે જૂના દિવસો વાગોળતાં કહે છે, 'યે દિલ્લગી' ફિલ્મમાં અક્ષય મારો મોટો ભાઈ બન્યો હતો, અને આજે પણ અમે બંને એટલા જ ગાઢ અને સારા મિત્રો છીએ.'