ઉત્પાદન ઘટવાની આશંકાથી તહેવારોમાં ખાંડ વધુ મોંઘી થશે

વૈશ્વિક ઉત્પાદનમાં ઘટાડાની આશંકા અને પુરવઠાની ચિંતાને કારણે ગયા મહિને ખાંડના ભાવમાં ૧૧%નો વધારો
અમદાવાદ : ભારતમાં તહેવારોની મોસમ નજીક આવી રહી હોવાના સંકેતને કારણે ગયા મહિનામાં ખાંડના ભાવમાં ૧૧%નો વધારો થયો છે. વૈશ્વિક ઉત્પાદનમાં ઘટાડો થવાની આશંકાથી ગયા મહિનામાં ખાંડના ભાવમાં લગભગ ૧૧%નો વધારો થયો છે. ઓછા ઉત્પાદનને કારણે, આગામી સમયમાં ખાંડના ભાવમાં તેજી રહેવાની ધારણા છે.
અલ નીનો, દુષ્કાળ અને ભારે ગરમીની અસરને કારણે, યુરોપિયન યુનિયન અને યુકેમાં ખાંડનું ઉત્પાદન ઘટીને ૧૪.૯૮ મિલિયન મેટ્રિક ટન થવાની ધારણા છે, જે ૧૧ વર્ષમાં સૌથી ઓછું છે. આનાથી વૈશ્વિક ખાંડના ઉત્પાદનમાં ઘટાડો થવાની ધારણા છે.
વૈશ્વિક ઉત્પાદનમાં ઘટાડાની વધતી આશંકા અને ૨૦૨૬-૨૭માં પુરવઠાની અછતની ચિંતાને કારણે ગયા મહિનામાં ખાંડ વધુ મોંઘી થઈ છે. તહેવારોની મોસમ પહેલા દેશમાં ખાંડનો સરેરાશ છૂટક ભાવ પ્રતિ કિલોગ્રામ રૂ. ૫૦.૩૦ પહોંચી ગયો છે. ગયા મહિનામાં ભાવમાં ૭%થી ૧૫%નો વધારો થયો છે, જેનું મુખ્ય કારણ શેરડીનું ઉત્પાદન ઓછું અને મર્યાદિત પુરવઠો છે.
ભારત હવામાન વિભાગના જણાવ્યા અનુસાર, ઓગસ્ટ અને સપ્ટેમ્બર દરમિયાન વરસાદ સામાન્ય કરતાં ઓછો રહેવાની ધારણા છે. ભારત વિશ્વનો બીજા ક્રમનો સૌથી મોટો ખાંડ ઉત્પાદક દેશ છે, તેથી ૨૦૨૬-૨૭માં પાકની સંભાવનાઓ માટે ચોમાસાનું પ્રદર્શન મહત્વપૂર્ણ છે.
આંતરરાષ્ટ્રીય ખાંડ સંગઠનને અપેક્ષા છે કે ૨૦૨૬-૨૭માં વૈશ્વિક ખાંડનું ઉત્પાદન વાર્ષિક ધોરણે ૧.૧૫% ઘટીને ૧૮૦ મિલિયન મેટ્રિક ટન થશે. આના પરિણામે ૨૬.૨ મિલિયન મેટ્રિક ટનનો ઘટાડો થવાની ધારણા છે.
મુખ્ય ખાંડ ઉત્પાદક દેશો, ખાસ કરીને ભારત, બ્રાઝિલ અને થાઇલેન્ડમાં પ્રતિકૂળ હવામાનના ભયે બજારમાં તેજીનું વાતાવરણ ઉભું કર્યું છે. બ્રાઝિલનું ઉત્પાદન ૩ ટકા ઘટીને ૪.૨૫ મિલિયન મેટ્રિક ટન થવાનો અંદાજ છે, જ્યારે થાઇલેન્ડનું ઉત્પાદન ૧૫.૬ ટકા ઘટીને ૯.૫ મિલિયન મેટ્રિક ટન થવાનો અંદાજ છે.