નિયમનકારી સંસ્થાને સરકારી માન્યતા માટે ડિજિટલ ગોલ્ડ કંપનીઓની રજૂઆત

મુંબઈ : સિક્યુરિટીઝ એન્ડ એકસચેન્જ બોર્ડ ઓફ ઈન્ડિયા (સેબી)ની  આવી પડેલી ચેતવણી બાદ ડિજિટલ ગોલ્ડ કંપનીઓ પોતાની નિયમનકારી સંસ્થા (એસઆરઓ)ની રચના કરવા હિલચાલ ધરાયા બાદ આ કંપનીઓ દ્વારા સૂચિત એસઆરઓને માન્યતા મળે તે માટે પ્રયાસો હાથ ધરવામાં આવ્યા છે અને આ સંદર્ભમાં નાણાં મંત્રાલય સમક્ષ રજૂઆત કરવામાં આવી છે.

ડિજિટલ ગોલ્ડનો વેપાર કરતી કંપનીઓએ માત્ર નિયુકત બેન્કો મારફત જ વેપાર કરવાની પણ નાણાં મંત્રાલયને ખાતરી આપી હોવાનું આધારભૂત સુત્રોએ જણાવ્યું હતું. 

ગ્રાહક દ્વારા ખરીદાયેલા ડિજિટલ ગોલ્ડ જેટલું જ હાજર સોનુ વોલ્ટમાં રખાયું છે કે નહીં તેની પણ પેનલ પર નિશ્ચિત કરાયેલા ઓડિટરો  ખાતરી રાખશે એમ નાણાં મંત્રાલય સમક્ષ કરાયેલી રજૂઆતમાં જણાવાયું હતું. 

દેશમાં ડિજિટલ ગોલ્ડ ઉદ્યોગનું કદ અંદાજે રૂપિયા ૫૫૦૦૦ કરોડ જેટલું છે. ડિજિટલ ગોલ્ડ હાલમાં અનિયંત્રિત ઉદ્યોગ છે એમ જણાવી સેબીએ તાજેતરમાં તેમાં રોકાણ કરતા રોકાણકારોને ચેતવણી આપી હતી. 

ગોલ્ડ મેન્યુફેકચરિંગ એન્ડ સેફકીપિંગ કંપનીસ, એમએમટીસી-પીએએમપી સહિતની આગેવાન કંપનીઓ એક એવી સંસ્થા ઊભી કરવાની વિચારણા કરી રહી છે જે ઉદ્યોગ માટે માર્ગદર્શિકા ઘડી કાઢવા તથા સ્વનિયમન માટે માળખાની રચના કરવા દરખાસ્ત ધરાવે છે. 

યુપીઆઈના ઉપયોગ દ્વારા ડિજિટલ ગોલ્ડની ખરીદી ગયા મહિને ૬૦ ટકા જેટલી ઘટી વર્તમાન વર્ષના તળિયે રહી હતી. ડિજિટલ ગોલ્ડ પર કોઈ નિયમન નહીં હેવાની વારંવારની ચેતવણીને પગલે ખરીદી પર અસર પડી હોવાનું માનવામાં આવે છે. 

ડિજિટલ ગોલ્ડનું વેચાણ કરતી કંપની જો બંધ પડી જાય તો તેવા કિસ્સામાં રોકાણકારોએ સહન કરવાનો વારો આવી શકે છે, તે હકીકતને ધ્યાનમાં રાખી વિવિધ સ્તરેથી તેની સામે ચેતવણી ઉચ્ચારવામાં આવી રહી છે. 

ડિજિટલ ગોલ્ડની ગ્રાહક દ્વારા ખરીદીની સામે જો ડિજિટલ ગોલ્ડ વેચતી કંપની હાજર સોનાની ખરીદી ન કરે તો તેવી સ્થિતિમાં પણ ગ્રાહકે સહન કરવાનો વારો આવી શકે છે.