પીટ હેગસેથની સત્તા બચી ગઈ, અમેરિકન સંસદમાં મહાભિયોગ ફેલ, ખુશખુશાલ ટ્રમ્પે ગણાવ્યા મહાન દેશભક્ત

Pete Hegseth Impechment Failed : અમેરિકાના સંરક્ષણ મંત્રી પીટ હેગસેથ વિરુદ્ધ લાવવામાં આવેલો મહાભિયોગ પ્રસ્તાવ હાઉસ ઓફ રિપ્રેઝન્ટેટિવ્સમાં માત્ર 7 વોટથી નિષ્ફળ ગયો છે. મંગળવારે યોજાયેલા આ મતદાનમાં સત્તાધારી રિપબ્લિકન પાર્ટીના સાંસદોએ એકજુટ થઈને ડેમોક્રેટ્સની આ કોશિશને ફગાવી દીધી હતી. પ્રતિનિધિ સભામાં મહાભિયોગના પ્રસ્તાવને 'હાઉસ જ્યુડિશિયરી કમિટી'માં મોકલવાના મામલે 211 વિરુદ્ધ 204 વોટથી નિર્ણય લેવાયો હતો, જેના કારણે હેગસેથની સત્તા હાલ પૂરતી બચી ગઈ છે. આ પ્રસ્તાવ રજૂ કરનાર થોમસ મેસી સિવાયના તમામ રિપબ્લિકન સાંસદોએ હેગસેથના સમર્થનમાં મતદાન કર્યું હતું.

અમેરિકન પ્રમુખ ડોનાલ્ડ ટ્રમ્પે આ ઘટના પર ખુશી વ્યક્ત કરતા ડેમોક્રેટ્સના પ્રયાસો નિષ્ફળ ગયા હોવાનું જણાવ્યું હતું. પોતાના સોશિયલ મીડિયા પ્લેટફોર્મ પર પ્રતિક્રિયા આપતા ટ્રમ્પે પીટ હેગસેથને 'મહાન અમેરિકન દેશભક્ત' ગણાવ્યા હતા અને વેનેઝુએલા તથા ઈરાનમાં મળેલી સફળતાઓ તેમજ સૈન્ય ભરતી અને મનોબળ વધારવાનો શ્રેય તેમને આપ્યો હતો. જો આ પ્રસ્તાવ પાસ થઈ ગયો હોત, તો હેગસેથ અમેરિકન ઇતિહાસમાં મહાભિયોગનો સામનો કરનાર પ્રથમ સંરક્ષણ મંત્રી બન્યા હોત, કારણ કે આ પહેલા 1876માં વોર સેક્રેટરી વિલિયમ બેલકનાપે આવા જ મામલે સામનો કર્યો હતો.

જોકે, આ રાહત અસ્થાયી સાબિત થઈ શકે છે કારણ કે તાજેતરની મિડટર્મ ચૂંટણીમાં ડેમોક્રેટ્સ વિજયી બન્યા છે અને આગામી જાન્યુઆરી 2027થી સંસદના બંને સદનોમાં તેમનું નિયંત્રણ આવી જશે. આ સમગ્ર ઘટનાક્રમ એવા સમયે સામે આવ્યો છે જ્યારે રિપબ્લિકન પાર્ટી ચૂંટણીમાં થયેલા પરાજય અને મોંઘવારી જેવા મુદ્દાઓથી ઝઝૂમી રહી છે, છતાં ટ્રમ્પના સમર્થનને કારણે હેગસેથનું પદ હાલ સુરક્ષિત રહ્યું છે.