શેરબજારમાં 'બ્લેક મન્ડે': સેન્સેક્સ 1000 તો નિફ્ટીમાં 270 પોઈન્ટનો કડાકો, રોકાણકારોમાં ફફડાટ

Sensex and Nifty : વૈશ્વિક બજારોમાં મચેલા હાહાકારની સીધી અસર આજે ભારતીય શેરબજાર પર જોવા મળી છે.  અઠવાડિયાના પ્રથમ દિવસે જ ભારતીય શેરબજારમાં મોટી સુનામી જોવા મળી છે. વૈશ્વિક સ્તરે વધી રહેલા તણાવ અને એશિયન બજારોમાં આવેલા કડાકાને કારણે આજે શેરબજાર ખૂલતાની સાથે જ ધડાધડ નીચે પટકાયું હતું. સેન્સેક્સ અને નિફ્ટી બંને મહત્વના સ્તરો તોડીને લાલ નિશાનમાં ટ્રેડ કરી રહ્યા છે.

બજારના આજના લેટેસ્ટ આંકડા 

BSE Sensex: સેન્સેક્સ અત્યારે 1,018.00 પોઈન્ટ (-1.38%) ના તોતિંગ ઘટાડા સાથે 72,565.22 પર ટ્રેડ કરી રહ્યો છે. અત્રે ઉલ્લેખનીય છે કે સેન્સેક્સનો અગાઉનો બંધ 73,583.22 હતો, જેની સામે આજે તે ખૂબ જ નીચે ખૂલ્યો છે.

Nifty 50: નિફ્ટીમાં પણ 269.95 પોઈન્ટ (-1.18%) નો ઘટાડો જોવા મળ્યો છે. નિફ્ટી અત્યારે 22,549.65 ના સ્તર પર છે. નિફ્ટીનો અગાઉનો બંધ 22,819.60 હતો.

બજારમાં કડાકા પાછળના મુખ્ય કારણોનું વિશ્લેષણ:

વર્તમાન સ્થિતિ મુજબ બજાર તૂટવા પાછળ નીચે મુજબના કારણો જવાબદાર છે

1. ઈરાન-અમેરિકા યુદ્ધની અસર: મિડલ ઈસ્ટમાં ઈરાન અને અમેરિકા વચ્ચે વધતા સૈન્ય સંઘર્ષને કારણે વૈશ્વિક રોકાણકારો સુરક્ષિત રોકાણ તરફ વળ્યા છે અને શેરબજારમાંથી નાણાં ખેંચી રહ્યા છે.

2. ક્રૂડ ઓઈલના ભાવમાં ભડકો: કાચા તેલના ભાવ $109 પ્રતિ બેરલને પાર કરી ગયા છે. ભારત તેની જરૂરિયાતનું મોટું નિકાસ બહારથી કરે છે, તેથી તેલના વધતા ભાવ ભારતીય અર્થતંત્ર અને રૂપિયા માટે નકારાત્મક છે.

3. એશિયન બજારોમાં નબળાઈ: જાપાન, કોરિયા અને હોંગકોંગના બજારોમાં આજે સવારથી જ ભારે વેચવાલી જોવા મળી હતી, જેની સીધી અસર ભારતીય સેન્ટિમેન્ટ પર પડી છે.

4. ડોનાલ્ડ ટ્રમ્પની ધમકી: ટ્રમ્પ દ્વારા ઈરાનના તેલ ભંડાર અને ખાર્ગ આઈલેન્ડ પર કબજો કરવાની ચીમકીએ અનિશ્ચિતતામાં વધારો કર્યો છે.

રોકાણકારોની સંપત્તિમાં ધોવાણ

બજારમાં આવેલા આ પ્રારંભિક કડાકાને કારણે રોકાણકારોના લાખો કરોડ રૂપિયા ધોવાઈ ગયા છે. આઈટી, બેંકિંગ અને ઓટો સેક્ટરના શેરોમાં સૌથી વધુ દબાણ જોવા મળી રહ્યું છે. નિષ્ણાતોના મતે, જો વૈશ્વિક તણાવ ઓછો નહીં થાય તો આગામી દિવસોમાં બજાર હજુ પણ નીચે જઈ શકે છે.