ચાંદી ઉછળીને રૂ.1,65,000 : ચાર દિવસમાં રૂ.9000 વધ્યા : સોનું ઉંચકાયું

મુંબઈ : મુંબઈ ઝવેરી બજારમાં આજે ચાંદીના ભાવમાં તેજી આગળ વધી હતી સામે સોનાના ભાવ પણ આંચકા પચાવી ફરી વધી આવ્યા હતા. વિશ્વ બજારના સમાચાર પ્રોત્સાહક હતા. ઘરઆંગણે ઈમ્પોર્ટ કોસ્ટ ઉંચી રહી હતી. દરમિયાન, અમદાવાદ ઝવેરી બજારમાં આજે ચાંદીના ભાવ કિલોના વધુ રૂ.૧૫૦૦ વધી રૂ.૧૬૫૦૦૦ને આંબી ગયા હતા. ચાંદીના ભાવમાં છેલ્લા ચાર દિવસમાં રૂ.૯૦૦૦ની ઝડપી તેજી જોવા મળતા બજારમાં ખાસ્સી ચકચાર જાગી હતી. 

દરમિયાન, અમદાવાદ સોનાના ભાવ આજે ૧૦ ગ્રામના રૂ.૮૦૦ વધી ૯૯૫ના રૂ.૧૩૦૦૦૦ તથા ૯૯૯ના રૂ.૧૩૦૩૦૦ બોલાતા થયા હતા. દરમિયાન, વિશ્વ બજારમાં આજે સોનાના ભાવ ઔંશના ૪૧૫૬થી ૪૧૫૭ વાળા વધી ઉંચામાં ભાવ ૪૧૯૩ થઈ ૪૧૭૧થી ૪૧૭૨ ડોલર રહ્યાના નિર્દેશો મળ્યા હતા. સોના પાછળ વિશ્વ બજારમાં ચાંદીના ભાવ પણ ઔંશના ૫૩.૩૬થી ૫૩.૩૭ વાળા વધી ઉંચામાં ભાવ ૫૪ ડોલર પાર કરી ૫૪.૨૧થી ૫૪.૨૨ થઆ ૫૩.૮૪થી ૫૩.૮૫ ડોલર રહ્યા હતા. 

વૈશ્વિક પ્લેટીનમના ભાવ ઔંશદીઠ ૧૬૩૫ ડોલર રહ્યા હતા.  પેલેડીયમના ભાવ જો કે ૧૩૯૯ ડોલર રહ્યા હતા. વૈશ્વિક કોપરના ભાવ આજે ૦.૧૯ ટકા માઈનસમાં રહ્યા હતા. 

દરમિયાન, મુંબઈ બુલીયન બજારમાં આજે સોનાના ભાવ જીએસટી વગર ૯૯૫ના રૂ.૧૨૫૫૫૨૩ વાળા વધી રૂ.૧૨૬૧૫૯ થઈ છેલ્લે ભાવ રૂ.૧૨૬૦૮૪ રહ્યા હતા. જ્યારે ૯૯૯ના ભાવ ૧૨૬૦૫૭ વાળા વધી રૂ.૧૨૬૬૬૬ થઈ છેલ્લે ભાવ રૂ.૧૨૬૫૯૧ બંધ રહ્યા હતા. મુંબઈ ચાંદીના ભાવ આજે જીએસટી વગર રૂ.૧૬૨૬૬૭ વાળા વધી રૂ.૧૬૪૩૫૯ બંધ રહ્યા હતા. વિશ્વ બજારમાં આજે બ્રેન્ટ ક્રૂડતેલના ભાવ બેરલના ૬૩.૧૯ ડોલર તથા યુએસ ક્રૂડતેલના ભાવ ૫૯.૦૮ ડોલર રહ્યા હતા.

દરમિયાન, મુંબઈ કરન્સી બજારમાં આજે રૂપિયા સામે ડોલરના  ભાવ ૧૪ પૈસા વધ્યા હતા. ડોલરના ભાવ ઉંચામાં રૂ.૮૯.૫૦ થઈ છેલ્લે બંધ ભાવ રૂ.૮૯.૪૫ રહ્યા હતા. બ્રિટીશ પાઉન્ડના ભાવ ૧૭ પૈસા વધી ઉંચામાં ભાવ ૧૧૮.૪૬ થઈ છેલ્લે ભાવ રૂ.૧૧૮.૧૭ રહ્યા હતા.   યુરોપીયન કરન્સી યુરોના ભાવ ૧૦ પૈસા વધી ઉંચામાં ભાવ રૂ.૧૦૩.૭૨ થઈ છેલ્લે ભાવ ૧૦૩.૪૯ રહ્યા હતા.જાપાનની કરન્સી ૦.૧૪ ટકા વધી હતી. ચીનની કરન્સી રૂપિયા સામે ૦.૨૩ ટકા પ્લસમાં રહી હતી.

ડોલરનો વૈશ્વિક ઈન્ડેકસ આજે નીચામાં ૯૯.૨૫ તથા ઉંચામાં ૯૯.૪૮ થઈ  ૯૯.૩૯ રહ્યા હતા. દરમિયાન, દેશમાં ફોરેક્સ રિઝર્વ વધતું અટકી ૪.૪૭ અબજ ડોલર ઘટી ૬૮૮.૧૦ અબજ ડોલર થયાના સમાચાર મળ્યા હતા. દરમિયાન, ગોલ્ડ રિઝર્વ ૨.૬૭ અબજ ડોલર ઘટી ૧૦૪.૧૮ અબજ ડોલર નોંધાયાના સમાચાર મળ્યા હતા.