ચાંદી એક જ દિવસમાં MCX પર 7500 રૂપિયાના તોતિંગ ઉછાળા સાથે 2 લાખને પાર, સોનામાં તેજી

Silver and Gold Price : ભારતીય બુલિયન માર્કેટમાં બુધવારે ઐતિહાસિક દિવસ જોવા મળ્યો છે. ચાંદીના ભાવે અત્યાર સુધીના તમામ રેકોર્ડ તોડીને નવી ઓલ-ટાઇમ હાઈ સપાટી હાંસલ કરી છે. એક જ દિવસમાં આવેલા તોતિંગ ઉછાળાને કારણે ચાંદીનો ભાવ ₹2,05,000ને પાર કરી ગયો છે, જેનાથી રોકાણકારોમાં ખુશીનો માહોલ છે. ચાંદીની સાથે સોનાના ભાવમાં પણ ઉછાળો જોવા મળ્યો છે.

ચાંદીમાં જબરદસ્ત તેજી 

આજના કારોબારમાં, ચાંદીના વાયદા ભાવમાં ₹7,590નો જબરદસ્ત ઉછાળો નોંધાયો હતો, જે લગભગ 3.84%નો વધારો દર્શાવે છે. આ ઐતિહાસિક તેજી સાથે, માર્ચ 2026ના વાયદાનો ભાવ ₹2,05,345 પ્રતિ કિલોગ્રામની સપાટીએ પહોંચી ગયો હતો. બજાર નિષ્ણાતો આ ઉછાળાને અભૂતપૂર્વ ગણાવી રહ્યા છે, જેણે ટૂંકા ગાળામાં રોકાણકારોને મોટો નફો અપાવ્યો છે.

સોનામાં પણ ઉછળો  

ચાંદીની સાથે-સાથે સોનામાં પણ તેજીનો માહોલ જોવા મળ્યો. સોનાના ફેબ્રુઆરી 2026ના વાયદાના ભાવમાં ₹241નો વધારો નોંધાયો હતો, જેની સાથે સોનાનો ભાવ ₹1,34,650 પ્રતિ 10 ગ્રામ પર પહોંચી ગયો હતો. જોકે, સોનાનો ઉછાળો ચાંદીની સરખામણીમાં ઓછો હતો, તેમ છતાં બંને કિંમતી ધાતુઓમાં તેજીનો ટ્રેન્ડ સ્પષ્ટ દેખાઈ રહ્યો છે.

કોમોડિટી માર્કેટમાં ઉછાળાના કારણ શું? 

બજારના જાણકારો મુજબ, કિંમતી ધાતુઓમાં આ તેજી પાછળ વૈશ્વિક આર્થિક અનિશ્ચિતતા, મુખ્ય કરન્સી ડૉલર સામે રૂપિયાની નબળાઈ અને ભૌગોલિક-રાજકીય તણાવ જેવા પરિબળો જવાબદાર હોઈ શકે છે. સામાન્ય રીતે, જ્યારે બજારમાં જોખમ વધે છે, ત્યારે રોકાણકારો સોના-ચાંદી જેવી સુરક્ષિત ધાતુઓમાં રોકાણ કરવાનું પસંદ કરે છે. આ ઉપરાંત, ઔદ્યોગિક માંગમાં વધારો પણ ચાંદીના ભાવને ટેકો આપી રહ્યો છે. એકંદરે, બુલિયન માર્કેટમાં આવેલી આ ઐતિહાસિક તેજીએ રોકાણકારોને મોટી કમાણી કરાવી છે.