સેન્સેક્સ તેના સપ્ટેમ્બર ૨૦૨૪ના સર્વોચ્ચ સ્તરથી આશરે ૧૪% નીચે

બે વર્ષમાં કેટલીક વાર રિકવરી જોવાઈ, પરંતુ માર્કેટ આ ઉછાળાને ટકાવી રાખવામાં અસમર્થ રહ્યું
અમદાવાદ : ૨૬ સપ્ટેમ્બર, ૨૦૨૪ના રોજ બીએસઈ સેન્સેક્સ ૮૫,૮૩૬ પોઇન્ટની સર્વકાલીન ઊંચી સપાટીએ બંધ રહ્યો હતો. બે વર્ષ પછી પણ આ બેન્ચમાર્ક ઇન્ડેક્સ તે સ્તર કરતાં આશરે ૧૪% નીચે ટ્રેડ કરી રહ્યો છે, જે છેલ્લા એક દાયકામાં નવી ઊંચી સપાટી હાંસલ કરવા માટેની સૌથી લાંબી પ્રતીક્ષા દર્શાવે છે.
વૈશ્વિક અનિશ્ચિતતા, વિદેશી પોર્ટફોલિયો રોકાણકારો દ્વારા સતત વેચવાલી અને કંપનીઓના નબળા ત્રિમાસિક પરિણામો જેવા સંયુક્ત કારણોસર ઇન્ડેક્સ દબાણ હેઠળ રહ્યો છે.
આ બે વર્ષના સમયગાળા દરમિયાન જાન્યુઆરી અને માર્ચ ૨૦૨૬ સહિત કેટલીક વાર રિકવરી જોવા મળી હતી, પરંતુ માર્કેટ આ ઉછાળાને ટકાવી રાખવામાં અસમર્થ રહ્યું હતું.
ખાસ કરીને આઈટી, એફએમસીજી, રિયલ્ટી અને ઓઈલ એન્ડ ગેસ શેરોમાં તીવ્ર કરેક્શન જોવા મળ્યું છે. તેનાથી વિપરીત, મેટલ્સ, પીએસયુ બેન્કો અને ફાર્માસ્યુટિકલ શેરોએ બજારની સામાન્ય નબળાઈ સામે મજબૂતી દર્શાવી છે અને વધુ અસ્થિરતા વચ્ચે પણ નોંધપાત્ર વળતર આપ્યું છે.
અસ્થિરતા અને ચોક્કસ મર્યાદિત ગાળામાં ટ્રેડિંગનો આ લાંબો સમયગાળો હજુ ચાલુ રહી શકે છે.
સૌથી વધુ વૃદ્ધિ નોંધાવનાર સેક્ટર્સ
મેટલ્સ ૩૧.૦૬%
પીએસયુ બેંક ૨૧.૮૯%
ફાર્મા ૧૬.૧૪%
હેલ્થકેર ૧૩.૪૬%
(આંકડા % માં)
સૌથી વધુ પીછેહઠ નોંધાવનાર સેક્ટર્સ (વૃદ્ધિ % માં)
આઈટી ૩૩.૨૧
રિયાલ્ટી ૨૩.૧૫
ઓઈલ-ગેસ ૧૫.૩