Business

ખરીફ સિઝનમાં રેકોર્ડ વાવણી, ડાંગર તથા સોયાબીનના વાવેતરમાં વધારો

By GS Team
19 Jun 20252 mins read
This article was originally published on 19 Jun 2025
ખરીફ સિઝનમાં રેકોર્ડ વાવણી, ડાંગર તથા સોયાબીનના વાવેતરમાં વધારો

નવી દિલ્હી : ગ્રામ્ય વિસ્તારોમાં ખરીફ પાકોનું વાવેતર શરૂ થયું છે. શરૂઆતના તબક્કામાં જ આ પાકોનું વાવેતર મોટી સંખ્યામાં થઈ રહ્યું છે. આ પાકોનું વાવેતર ગયા વર્ષ કરતાં વધુ છે. 

ખરીફ સિઝનના મુખ્ય પાક ડાંગરનું વાવેતર પણ ગયા વર્ષ કરતાં વધુ ચાલી રહ્યું છે. મકાઈ, તુવેર, રાગી, કપાસ અને મગફળી સિવાય, મોટાભાગના અન્ય ખરીફ પાકોના વિસ્તારમાં વધારો નોંધવામાં આવ્યો છે. આ વર્ષે ૧૩ જૂન સુધીમાં ૮૯.૨૯ લાખ હેક્ટરમાં ખરીફ પાકનું વાવેતર થયું છે, જે ગયા વર્ષના ૮૭.૮૧ લાખ હેક્ટર વિસ્તાર કરતાં ૧.૬૮ ટકા વધુ છે.

ડાંગર ખરીફ સિઝનનો સૌથી મોટો પાક છે. કૃષિ અને ખેડૂત કલ્યાણ વિભાગના જણાવ્યા અનુસાર, ગયા અઠવાડિયાના અંત સુધીમાં એટલે કે ૧૩ જૂન સુધીમાં ૪.૫૩ લાખ હેક્ટરમાં ડાંગરનું વાવેતર થયું છે. ગયા વર્ષે આ જ સમયગાળામાં આ વિસ્તાર ૪ લાખ હેક્ટર હતો. આમ, આ વર્ષે ડાંગરના વાવેતર વિસ્તારમાં ૧૩.૨૫ ટકાનો વધારો થયો છે. આ જ સમયગાળામાં કપાસનો વાવેતર વિસ્તાર નજીવો ઘટીને ૧૩.૧૯ ટકા થયો છે. શણનું વાવેતર પણ ૩ ટકા ઘટીને ૫.૪૮ લાખ હેક્ટર થયું છે.

સરકારી આંકડા મુજબ, ૧૩ જૂનના રોજ પૂરા થતા સપ્તાહ સુધીમાં ૩.૦૭ લાખ હેક્ટરમાં કઠોળનું વાવેતર થયું છે, જે ગયા વર્ષના સમાન સમયગાળામાં ૨.૬૦ લાખ હેક્ટરમાં વાવેલા કઠોળ કરતાં ૧૮ ટકા વધુ છે. પ્રાપ્ત માહિતી અનુસાર, ૧૩ જૂન સુધીમાં, તેલીબિયાં પાકનું વાવેતર ૨.૦૫ લાખ હેક્ટર નોંધાયું હતું, જે ગયા વર્ષના સમાન સમયગાળાના ૧.૫૦ લાખ હેક્ટર કરતાં લગભગ ૩૦ ટકા વધુ છે.

આ સમયગાળા દરમિયાન, સોયાબીનનો વિસ્તાર અઢી ગણો વધીને ૧.૦૭ લાખ હેક્ટર થયો છે. સૂર્યમુખી, તલ, નાઇજર અને એરંડાનું વાવેતર પણ વધ્યું છે. જોકે, આ સમયગાળા દરમિયાન, મગફળીનું વાવેતર ૧૮ ટકા ઘટીને ૦.૫૮ લાખ હેક્ટર થયું છે.