RBI હસ્તક ગોલ્ડ રિઝર્વ વધી 100 અબજ ડોલરની સપાટી પાર કરી જતાં નવો રેકોર્ડ
મુંબઈ : મુંબઈ કરન્સી બજારમાં આજે રૂપિયા સામે ડોલરના ભાવ ઘટતા અટકી ફરી વધી આવતાં ધનતેરસ પૂર્વે રૂપિયામાં ફરી નબળાઈ જોવા મળી હતી.ડોલરના ભાવ રૂ.૮૭.૮૩ વાળા આજે સવારે રૂ.૮૭.૭૭ ખુલ્યા પછી નીચામાં ભાવ રૂ.૮૭.૭૪ રહ્યા પછી ઉંચામાં ભાવ રૂ.૮૭.૯૮ થઈ છેલ્લે બંધ ભાવ રૂ.૮૭.૯૭ રહ્યા હતા. રૂપિયા સામે ડોલરના ભાવ આજે ૧૪ પૈસા વધી જતાં ડોલર સામે રૂપિયો ૦.૧૬ ટકા નબળો પડયો હતો.
કરન્સી બજારમાં આજે વિવિધ સરકારી બેન્કોની ડોલરમાં નવી વેચવાલી ધીમી પડી હતી. જો કે શેરબજારમાં તેજી આગળ વધતાં તથા વિશ્વ બજારમાં ક્રૂડતેલના ભાવ ગબડતાં કરન્સી બજારમાં રૂપિયામાં ઘટાડો આજે મર્યાદિત રહ્યો હોવાનું બજારના જાણકારો જણાવી રહ્યા હતા.
દરમિયાન, ભારતમાં ફોરેક્સ રિઝર્વ વધુ ૨ અબજ ૧૮ કરોડ ડોલર ઘટી ૬૯૭.૭૮ અબજ ડોલર થયાના સમાચાર આવ્યા હતા. રિઝર્વ બેન્કની સક્રિયતા વચ્ચે તાજેતરમાં બેન્કોએ બજારમાં ડોલરમાં નોંધપાત્ર વેચવાલી કરતાં ફોરેક્સ રિઝર્વમાં પીછેહટ દેખાઈ હોવાનું જાણકારો જણાવી રહ્યા હતા.
જો કે રિઝર્વ બેન્ક હસ્તકના ફોરેક્સ રિઝર્વમાં ગોલ્ડ રિઝર્વ ૩ અબજ ૫૯થી ૬૦ કરોડ ડોલર જેટલું વધી ૧૦૦ અબજ ડોલરની સપાટી વટાવી આવું ગોલ્ડ રિઝર્વ ૧૦૨ અબજ ૩૬થી ૩૭ કરોડ ડોલરના મથાળે પહોંચી ગયાના સમાચાર મળ્યા હતા. સોનાના ભાવમાં તાજેતરમાં એકધારી રેકોર્ડ વૃદ્ધી થતાં રિઝર્વ બેન્ક પાસે ગોલ્ડ રિઝર્વના મુલ્યમાં નોંધપાત્ર વૃદ્ધી થઈ હોવાનું જાણકારોએ જણાવ્યું હતું.
દરમિયાન, મુંબઈ કરન્સી બજારમાં આજે ડોલર ઉંચકાયો હતો ત્યારે વિશ્વ બજારમાં ડોલરનો ઈન્ડેક્સ આજે ૦.૦૮ ટકા માઈનસમાં રહ્યાના નિર્દેશો મળ્યા હતા. વૈશ્વિક ડોલર ઈન્ડેક્સ નીચામાં ૯૮.૦૩ થઈ ૯૮.૨૬ રહ્યો હતો. મુંબઈ બજારમાં બ્રિટીશ પાઉન્ડના ભાવ ૧૮ પૈસા વધી રૂ.૧૧૮.૪૨ થઈ છેલ્લે ભાવ રૂ.૧૧૮.૧૮ રહ્યા હતા જ્યારે યુરોપીયન કરન્સી યુરોના ભાવ રૂપિયા સામે ૫૫ પૈસા વધી રૂ.૧૦૩.૧૦ થઈ છેલ્લે ભાવ રૂ.૧૦૨.૯૪ રહ્યા હતા.
જાપાનની કરન્સી રૂપિયા સામે આજે ૧.૧૪ ટકા ઉછળી હતી જ્યારે ચીનની કરન્સી રૂપિયા સામે ૦.૧૧ ટકા પ્લસમાં રહી હતી. દરમિયાન, ભારત તથા અમેરિકા વચ્ચે વેપાર વાટાઘાટોની હવે કેવી પ્રગતિ થાય છે તેના પર બજારની નજર રહી હતી. અમેરિકાના પ્રમુખ તથા રશિયાના પ્રમુખ વચ્ચે મળી રહેલી મિટિંગ પર પણ વિશ્વ બજારના ખેલાડીઓની નજર રહી હતી.
