Business

અમેરિકાના સૂચિત ટેરિફ તથા રેર અર્થની અછતથી દેશમાં વાહનોનો પૂરવઠો ખોરવાઈ જવાનું જોખમ

By GS Team
8 Jul 20252 mins read
This article was originally published on 8 Jul 2025
અમેરિકાના સૂચિત ટેરિફ તથા રેર અર્થની અછતથી દેશમાં વાહનોનો પૂરવઠો ખોરવાઈ જવાનું જોખમ

મુંબઈ : ભૌગોલિકરાજકીય તાણ અને અમેરિકાના સૂચિત ટેરિફથી દેશના વપરાશકારોના માનસ પર પ્રતિકૂળ અસર પડી શકે છે એટલું જ નહીં ચીન દ્વારા રેર અર્થ નિકાસ પર અંકૂશને કારણે વાહનોનો પૂરવઠો ખોરવાઈ જવાની શકયતા છે જેની સીધી અસર દેશમાં વાહનોના રિટેલ વેચાણ પર જોવા મળશે એમ ફેડરેશન ઓફ ઓટોમોબાઈલ ડીલર્સ એસોેસિએશન (ફાડા) દ્વારા એક નિવેદનમાં જણાવાયું છે.

વર્તમાન વર્ષના મેની સરખામણીએ જૂનમાં વાહનોના રિટેલ વેચાણમાં ૯.૪૦ ટકા ઘટાડો થયો છે અને શોરૂમમાં  એક કારનો ઈન્વેન્ટરીનો સરેરાશ સમય જે મેમાં ૫૨-૫૩ દિવસ હતો તે જૂનમાં વધી ૫૫ દિવસ પહોંચી ગયો હતો જે ફાડા દ્વારા ભલામણ કરાયેલા ૨૧ દિવસની મર્યાદા કરતા ઘણો વધુ છે. જો કે વાર્ષિક ધોરણે ઓટો વેચાણમાં વધારો જોવા મળ્યો છે. 

રેર અર્થની નિકાસ પર ચીન દ્વારા મુકાયેલા અંકૂશથી વૈશ્વિક સ્તરે ઓટો પૂરવઠા સાંકળ ખોરવાઈ ગઈ છે એટલું જ નહીં અમેરિકા દ્વારા ટેરિફ મુદ્દે અનિશ્ચિતતા વચ્ચે  ઊંચી ઈન્વેન્ટરી તથા તંગ નાણાં સ્થિતિનો સામનો કરી રહેલા ભારત માટે સ્થિતિ વણસી શકે છે એમ ફાડા દ્વારા જણાવાયું હતું.

જો કે વર્તમાન વર્ષમાં દેશમાં ચોમાસાની સ્થિતિ સાનુકૂળ રહેતા નજીકના ભવિષ્યમાં ગ્રામ્ય સ્તરે ઓટો માગ નીકળવાની શકયતા જોવાઈ રહી છે. 

દરમિયાન મેની સરખામણીએ ઓટો વેચાણમાં ભલે ઘટાડો નોંધાયો હોય પરંતુ જૂનમાં વાર્ષિક ધોરણે ઓટો રિટેલ વેચાણમાં પાંચ ટકા તંદૂરસ્ત વધારો નોંધાયો હોવાનું ફાડાના ડેટા જણાવે છે.

દેશમાં ચોમાસાની સારી શરૂઆત થઈ છે અને  ચીનના રેર અર્થની નિકાસ પર અંકૂશની ભારતના ઓટો ઉત્પાદકો પર હજુ અસર જોવા મળી નથી એમ ફાડાના પ્રમુખ સીએસ વિઘ્નેશ્વરે એક નિવેદનમાં જણાવ્યું હતું. 

વર્તમાન નાણાં વર્ષના પ્રથમ ત્રિમાસિકમાં ઊતારૂ વાહનોનું રિટેલ વેચાણ વાર્ષિક ધોરણે ૨.૫૯ ટકા ઊંચુ રહ્યું છે. ઊતારૂ વાહનોનું વેચાણ જે ગયા વર્ષના જૂનમાં ૨૯૦૫૯૩ એકમ રહ્યું હતું તે વર્તમાન વર્ષના જૂનમાં વધી ૨૯૭૭૨૨ એકમ જોવા મળ્યું છે.

એકંદર ઓટો રિટેલ વેચાણ આંક જૂનમાં ૨૦ લાખ રહ્યો છે જે ગયા વર્ષના આ મહિનામાં ૧૯.૧૦ લાખ એકમ રહ્યો હતો. સૌથી વધુ વેચાણ વૃદ્ધિ ૯ ટકા સાથે ટ્રેકટર્સમાં જોવા મળી છે જ્યારે સાત ટકા સાથે કમર્સિઅલ વાહનોનો ક્રમ બીજો રહ્યો છે. ટુ વ્હીલર્સમાં પાંચ ટકા તથા થ્રી વ્હીલર્સમાં ૬ ટકા વધારો થયો છે જ્યારે ઊતારૂ વાહેનાના વેચાણમાં ૨.૫૦ ટકા વધારો થયાનું પણ ફાડાના ડેટા જણાવે છે.