9.84 રૂપિયે લિટર વેચાતું પેટ્રોલ આજે 94 રૂપિયે પહોંચ્યું, 34 વર્ષમાં 10 ગણો વધારો

Petrol Price increase : દેશમાં લાંબા સમયથી પેટ્રોલ અને ડીઝલના ભાવમાં ખાસ કોઈ ફેરફાર થયો નથી. પરંતુ 1990થી લઈને અત્યાર સુધીમાં દેશમાં પેટ્રોલની કિંમત લગભગ 10 ગણી વધી ગઈ છે. વર્ષ 1990માં દિલ્હીમાં પેટ્રોલની કિંમત 9.84 રૂપિયા પ્રતિ લિટર હતી જે આજે 94.72 રૂપિયા પ્રતિ લિટર છે. 

છેલ્લા ત્રણ દાયકામાં દેશમાં પેટ્રોલના ભાવ વધવાના ઘણા કારણો હતા. આમાં ઘણા પ્રકારના ટેક્સનો સમાવેશ થાય છે. ભારતમાં પેટ્રોલની છૂટક કિંમતમાં ટેક્સનો હિસ્સો 55 રૂપિયાની આસપાસ છે. કેન્દ્ર અને રાજ્ય સરકારો બંને પેટ્રોલ પર ટેક્સ વસૂલે છે. ભારતની સરખામણીએ અમેરિકામાં પેટ્રોલની કિંમત 1990થી માંડ ત્રણ ગણી વધી છે.

અમેરિકામાં 1990માં એક ગેલન પેટ્રોલની સરેરાશ કિંમત 1.14 ડોલર હતી, જે હવે 3.33 ડોલર પર પહોંચી ગઈ છે. એક ગેલન 3.785 લિટર બરાબર છે. ભારતીય રૂપિયામાં જોઈએ તો અમેરિકામાં તે 93 રૂપિયા પ્રતિ લિટરની આસપાસ છે.

2022માં સમગ્ર વિશ્વમાં ક્રૂડ ઓઈલની કિંમતમાં નોંધપાત્ર વધારો

યુક્રેન યુદ્ધના કારણે 2022માં સમગ્ર વિશ્વમાં ક્રૂડ ઓઈલની કિંમતમાં નોંધપાત્ર વધારો થયો હતો. તેના કારણે અમેરિકામાં પેટ્રોલની સરેરાશ કિંમત 5.28 ડોલર પ્રતિ ગેલન પર પહોંચી ગઈ છે. પરંતુ ગયા વર્ષે તેમાં થોડો ઘટાડો થયો અને પ્રતિ ગેલન 4.78 ડોલર રહ્યો હતો. 2016માં અમેરિકામાં પેટ્રોલની કિંમત ઘટીને 2.8 ડોલર પ્રતિ ગેલન થઈ ગઈ હતી. એ જ રીતે, 2012માં તે 4.09 ડોલર પ્રતિ ગેલન પર પહોંચી ગયું હતું. આ પરિપ્રેક્ષ્યમાં જોવામાં આવે તો 2012ની સરખામણીમાં આજે અમેરિકામાં પેટ્રોલની કિંમત ઓછી છે. પરંતુ ભારતમાં આવું નથી. દેશમાં પેટ્રોલના ભાવમાં સતત વધારો થઈ રહ્યો છે.

1990માં 9.84 રૂપિયા પ્રતિ લિટર હતો પેટ્રોલનો ભાવ

ભારતમાં પેટ્રોલની કિંમત માર્ચ 1990માં 9.84 રૂપિયા પ્રતિ લિટર હતી, જે ઓક્ટોબરમાં 12.23 રૂપિયા પર પહોંચી ગઈ હતી. આગલા વર્ષે એટલે કે 1991માં દેશમાં પેટ્રોલની કિંમત 14.62 રૂપિયા પર પહોંચી ગઈ હતી. 1992માં દેશમાં પેટ્રોલની કિંમત 15.71 રૂપિયા પ્રતિ લિટર હતી જ્યારે 1994માં તે 16.78 રૂપિયા પર પહોંચી ગઈ હતી. તે 1996માં રૂ. 21.13, 1997માં રૂ. 22.84, 1998માં રૂ. 23.94, 1999માં રૂ. 23.8 અને નવેમ્બર 2000માં રૂ. 28.7 પર પહોંચ્યો હતો. 2003માં પેટ્રોલની કિંમત 32.49 રૂપિયા, 2005માં 40.49 રૂપિયા, 2007માં 47.51 રૂપિયા, 2008માં 45.56 રૂપિયા, 2011માં 47.93 રૂપિયા, 2012માં 73.18 રૂપિયા અને 2012માં 7 રૂપિયા 81 રૂપિયા હતી.