રોકાણકારો સાવધાન! શુક્રવારે સોના-ચાંદીના ભાવમાં કડાકાના સંકેત, ગ્લોબલ માર્કેટમાં મોટું ગાબડું

Gold Silver Price Today: ભારતીય શેરબજાર ગુરુવારે રજાના કારણે બંધ છે, પરંતુ દુનિયાભરના બજારોમાં મોટી હલચલ ચાલુ છે. યુદ્ધની સ્થિતિ વચ્ચે એશિયાઈ બજારોમાં ભારે દબાણ જોવા મળી રહ્યું છે, તો યુરોપિયન બજારો પણ 0.50 ટકા જેટલા ઘટીને કારોબાર કરી રહ્યા છે. આ દરમિયાન આંતરરાષ્ટ્રીય બજારમાંથી સોના-ચાંદીને લઈને મોટા સમાચાર સામે આવી રહ્યા છે.

વૈશ્વિક બજારમાં કિંમતોમાં ગાબડું, શુક્રવાર રોકાણકારો માટે ભારે

ગુરુવારે ગ્લોબલ માર્કેટમાં સોના અને ચાંદીના ભાવમાં કડાકો જોવા મળ્યો છે. સોનાની સરખામણીએ ચાંદીમાં વધુ ઘટાડો નોંધાયો છે. આંતરરાષ્ટ્રીય બજારમાં સ્પોટ ગોલ્ડ (Spot Gold) 4,453 ડોલર પ્રતિ ઔંસ પર ટ્રેડ કરી રહ્યું છે, જ્યારે ચાંદી 69 ડોલર પ્રતિ ઔંસ પર પહોંચી ગઈ છે. ચાંદીની કિંમતોમાં 2.50 ટકાથી વધુ અને સોનામાં 1 ટકાથી વધુનો ઘટાડો જોવા મળી રહ્યો છે. આ સંકેતો જોતા શુક્રવારે ભારતીય બજાર ખુલતાની સાથે જ ભાવમાં મોટો ઘટાડો થવાની પૂરેપૂરી શક્યતા છે.

ભારતીય બજારમાં હાલ શું છે સ્થિતિ

આજે ગુરુવારે માર્કેટ બંધ છે પણ હાલમાં ભારતીય બજારમાં MCX પર સોનાનો ભાવ 1,44,100 રૂપિયા પ્રતિ 10 ગ્રામ છે. બુધવારે સોનું 3.73 ટકાના ઉછાળા સાથે બંધ થયું હતું, જ્યારે ચાંદીનો ભાવ 2,34,700 રૂપિયા પ્રતિ કિલો રહ્યો હતો. નોંધનીય છે કે આ અઠવાડિયે સોના-ચાંદીમાં ભારે અસ્થિરતા જોવા મળી છે. સોમવારે ચાંદી ઘટીને 1,99,000 અને સોનું 1,30,000 રૂપિયાની નીચે સરકી ગયું હતું, જે બાદ મંગળવાર અને બુધવારે રિકવરી જોવા મળી હતી.

રોકાણકારો માટે સાવચેતીનો સંકેત

છેલ્લા એક વર્ષમાં સોના-ચાંદીના વળતરે ઈક્વિટી માર્કેટને પણ પાછળ છોડી દીધું છે. ચાંદીએ એક વર્ષમાં 100 ટકાથી વધુ અને સોનાએ 50 ટકાથી વધુ રિટર્ન આપ્યું છે. જો કે છેલ્લા બે મહિનામાં ચાંદી અંદાજે 45 ટકા અને સોનું 30 ટકા જેટલું સસ્તું થયું છે.

આ પણ વાંચો: તમામ રાજ્યોના મુખ્યમંત્રી સાથે બેઠક કરશે PM મોદી, મિડલ ઈસ્ટ યુદ્ધ પર ચર્ચા

નિષ્ણાતોનો શું છે મત?

વૈશ્વિક સંકટ કે યુદ્ધની સ્થિતિમાં સુરક્ષિત રોકાણ તરીકે સોના-ચાંદીની માગ વધે છે, જેનાથી કિંમતો વધી શકે છે. પરંતુ હાલમાં બજારમાં અસ્થિરતાનું પ્રમાણ અને જોખમ વધુ છે તેથી ઘટાડો જોવા મળી રહ્યો છે, તેને જોતા રોકાણકારોએ અત્યારે સાવચેતીપૂર્વક રોકાણ કરવાની જરૂર છે.