ઓનલાઈન ગેમિંગ પ્રતિબંધની અસર : ડ્રીમ11 સહિત 4 કંપની યુનિકોર્ન યાદીમાંથી બહાર

અમદાવાદ : ગયા મહિને લાગુ કરાયેલા નવા ઓનલાઈન ગેમિંગ કાયદાએ ભારતના રિયલ મની ગેમિંગ (RMG) ઉદ્યોગને મોટો ફટકો આપ્યો છે. આ કાયદાએ લુડો, પોકર, રમી અને ફેન્ટસી સ્પોર્ટ્સ જેવી તમામ પ્રકારની રિયલ મની ગેમ્સ પર પ્રતિબંધ મૂક્યો છે. આ કારણે, ઓછામાં ઓછી ચાર મોટી ગેમિંગ કંપનીઓએ તેમનો યુનિકોર્નનો દરજ્જો ગુમાવ્યો છે. યુનિકોર્ન એટલે સ્ટાર્ટઅપ કંપનીઓ જેમનું મૂલ્ય ૧ બિલિયન ડોલર કે તેથી વધુ છે.

યુનિકોર્ન અને ફ્યુચર યુનિકોર્ન રિપોર્ટ ૨૦૨૫ અનુસાર, ડ્રીમ૧૧, ગેમ્સ૨૪×૭, ગેમ્સક્રાફ્ટ અને મોબાઇલ પ્રીમિયર લીગ જેવી જાણીતી કંપનીઓ આ કાયદાની ઝપેટમાં આવી ગઈ હતી. આ કંપનીઓના મૂલ્યાંકનમાં ભારે ઘટાડો જોવા મળ્યો છે. આ ઉપરાંત, ઝુપી અને વિન્ઝો ગેમ્સ જેવી કંપનીઓ, જેમનું મૂલ્ય અનુક્રમે ૫૦૦ મિલિયન ડોલરથી ૧ બિલિયન ડોલર અને ૨૦૦ થી ૫૦૦ મિલિયન ડોલરની વચ્ચે હતું, તેમના યુનિકોર્ન બનવાના સપના પણ ચકનાચૂર થતા જોવા મળી રહ્યા છે.

રિયલ મની ગેમિંગ પહેલેથી જ એક જોખમી વ્યવસાય હતો. પરંતુ આવા અચાનક નિયમોએ સ્ટાર્ટઅપ્સનો જુસ્સો તોડી નાખ્યો હતો. જાણકારોએ કહ્યું કે સ્ટાર્ટઅપ્સ માટે સ્થિર નિયમો હોવા ખૂબ જ મહત્વપૂર્ણ છે. ગેમિંગ કંપનીઓ કહે છે કે આ પ્રતિબંધ પહેલાં તેમની સાથે કોઈ પરામર્શ કરવામાં આવ્યો ન હતો.

બીજી તરફ, ૨૦૨૫માં ભારતમાં ૧૧ નવી યુનિકોર્ન કંપનીઓ ઉભરી આવી હતી. આમાંથી, ફિનટેક ક્ષેત્રે નાવી ટેક્નોલોજીસ, જસ્પાય, વિવૃતિ કેપિટલ, વેરિટાસ ફાઇનાન્સ અને મનીવ્યુ જેવી ફિનટેક કંપનીઓ નવા યુનિકોર્નની યાદીમાં જોડાઈ હતી. આ ઉપરાંત, એઆઈ ટેક, રેપિડો, નેત્રાડાઈન, જમ્બોટેલ, ડ્રેઈનબોક્સ અને ડ્રલ પણ આ વર્ષે યુનિકોર્ન બન્યા છે. ૨૦૨૫માં ભારતમાં યુનિકોર્ન કંપનીઓની કુલ સંખ્યા વધીને ૭૩ થઈ ગઈ હતી.