Gold and Silver Rates Today: સોના-ચાંદી બજારમાં રોકાણકારો માટે મોટા સમાચાર સામે આવ્યા છે. ગુરુવારે સોના અને ચાંદીના ભાવમાં (Gold-Silver Rates) ફરી એકવાર મોટો ઘટાડો જોવા મળ્યો છે. મલ્ટી કોમોડિટી એક્સચેન્જ (MCX) પર ચાંદીનો ભાવ ખુલતાની સાથે જ પ્રતિ કિલોએ રૂ. 6,000થી વધુ ઘટી ગયો છે. આ ઘટાડા બાદ ચાંદી હવે તેના ઓલટાઇમ હાઇ લેવલથી રૅકોર્ડબ્રેક સસ્તી મળી રહી છે.
ચાંદીના ભાવમાં એક ઝાટકે રૂ. 6,144નો ઘટાડો
MCX પર 5 મેની એક્સપાયરી વાળી ચાંદીના ભાવમાં ગુરુવારે કડાકો બોલાયો છે. બુધવારે ચાંદી પ્રતિ કિલો રૂ. 2,48,364 પર બંધ થઈ હતી, જે ગુરુવારે સવારે ખુલતાની સાથે જ ઘટીને રૂ. 2,42,220 પર આવી ગઈ હતી. આમ, ચાંદીના ભાવમાં સીધો રૂ. 6,144નો ઘટાડો નોંધાયો છે.
સોનું પણ રૂ. 900થી વધુ સસ્તું થયું
ચાંદીની સાથે પીળી ધાતુ સોનાના ભાવમાં પણ પીછેહઠ જોવા મળી છે. 5 જૂનની એક્સપાયરી વાળું સોનું તેના અગાઉના બંધ ભાવ રૂ. 1,52,657ની સરખામણીએ ઘટીને રૂ. 1,51,719 પ્રતિ 10 ગ્રામ પર પહોંચ્યું છે. એટલે કે સોનામાં પ્રતિ 10 ગ્રામ (24 કેરેટ) રૂ. 938નો ઘટાડો થયો છે.
આ પણ વાંચો : બંગાળના મતદાનમાં જેનો ડર હતો એ જ થયું! મુર્શિદાબાદ અને સિલિગુડીમાં ઘર્ષણ
રૅકોર્ડ હાઇથી અત્યાર સુધીનો સૌથી મોટો ઘટાડો
જાન્યુઆરી મહિનામાં સોના-ચાંદીના ભાવ આસમાને પહોંચ્યા હતા. તે હાઇ લેવલથી સરખામણી કરીએ તો ચાંદી: જાન્યુઆરીમાં ચાંદી રૂ. 4,39,337 પ્રતિ કિલોના લેવલે પહોંચી હતી. આજના ઘટાડા બાદ તે હાઇ લેવલથી રૂ. 1,97,117 સસ્તી થઈ છે. સોનું: સોનાએ જાન્યુઆરીમાં રૂ. 2,02,984 પ્રતિ 10 ગ્રામનો ઐતિહાસિક આંકડો સ્પર્શ્યો હતો. હવે તે હાઇ લેવલથી રૂ. 51,265 સસ્તું મળી રહ્યું છે.
માર્કેટની સ્થિતિ
ઇન્ડિયન બુલિયન જ્વેલર્સ ઍસોસિએશન (IBJA) મુજબ, બુધવારે સાંજે 24 કેરેટ સોનું રૂ. 1,52,116 પ્રતિ 10 ગ્રામ અને ચાંદી રૂ. 2,48,682 પ્રતિ કિલો પર બંધ રહી હતી. નોંધનીય છે કે આ દરોમાં GST અને મેકિંગ ચાર્જ સામેલ હોતા નથી, તેથી જ્વેલરી શોરૂમમાં અંતિમ કિંમત અલગ-અલગ હોઈ શકે છે.
