સોના-ચાંદીમાં પ્રચંડ તેજી, તમામ રૅકોર્ડ ધ્વસ્ત, સોનું ₹1.72 લાખ અને ચાંદી ₹3.77 લાખને પાર

Silver and Gold Price : વૈશ્વિક બજારમાં સર્જાયેલી અસ્થિરતા અને વધતી જતી માગને કારણે કિંમતી ધાતુઓના ભાવમાં આજે અત્યાર સુધીનો સૌથી મોટો અને ઐતિહાસિક ઉછાળો જોવા મળ્યો છે. 28 જાન્યુઆરી 2026ના રોજ સોનું અને ચાંદી બંનેએ પોતપોતાની નવી સર્વોચ્ચ સપાટી (All-Time High) સર કરી છે. ભારતીય બજારમાં સોનાના ભાવમાં પ્રતિ 10 ગ્રામ ₹5000થી વધુનો વધારો થયો છે, જ્યારે ચાંદીમાં પ્રતિ કિલોગ્રામ ₹21000થી વધુનો તોતિંગ ઉછાળો નોંધાયો છે.

સોનામાં ઐતિહાસિક તેજી 

ભારતીય કોમોડિટી માર્કેટ (MCX) પર સોનાનો વાયદો ₹171489ના ભાવે ખૂલ્યો હતો. જે અગાઉના ₹1,67921ના બંધ ભાવની સરખામણીએ સોનામાં આશરે ₹5000 જેટલો પ્રચંડ વધારો દર્શાવે છે. કારોબાર દરમિયાન સોનું ₹172949ની સર્વોચ્ચ સપાટીએ પહોંચ્યું હતું. આંતરરાષ્ટ્રીય બજારમાં પણ સોનાએ મનોવૈજ્ઞાનિક સ્તર પાર કરતાં પ્રતિ ઔંસ $5063.82ના ભાવે ટ્રેડિંગ કરી રહ્યું છે.

ચાંદીએ તોડ્યા રૅકોર્ડ 

બીજી તરફ, ચાંદીમાં આવેલી તેજીએ રોકાણકારોને સ્તબ્ધ કરી દીધા છે. MCX પર ચાંદી ₹364821ના સ્તરે ખૂલીને જોતજોતામાં ₹377655ના હાઇ લેવલ પર પહોંચી ગઈ હતી. અગાઉના ₹356279ના બંધ ભાવ સામે અત્યારે ચાંદી ₹376922 પર ટ્રેડ થઈ રહી છે, જે 5.79%નો સીધો ઉછાળો દર્શાવે છે. વૈશ્વિક બજારમાં ચાંદી $107.61ના સ્તરે પહોંચી છે, જે તેની અત્યાર સુધીની સૌથી ઊંચી કિંમત છે.

બજારના નિષ્ણાતોના મતે, આંતરરાષ્ટ્રીય સ્તરે ચાલી રહેલા ભૌગોલિક તણાવ અને ડૉલરના મૂલ્યમાં ફેરફારને કારણે રોકાણકારો સુરક્ષિત રોકાણ તરીકે સોના-ચાંદી તરફ વળ્યા છે. એક જ દિવસમાં સોનામાં ₹5000 અને ચાંદીમાં ₹21000થી વધુનો આ ઉછાળો (ઓપનથી હાઇ) ઇતિહાસમાં વિરલ માનવામાં આવે છે.