ટ્રમ્પની ઈરાને ધમકી બાદ ચાંદીના ભાવમાં રૂ.10900ની તો સોનામાં રૂ.2400ની ઉથલપાથલ, જાણો લેટેસ્ટ ભાવ

Gold and Silver Price : અમેરિકાના રાષ્ટ્રપ્રમુખ ડોનાલ્ડ ટ્રમ્પે ઈરાનને ખતમ કરવાની ધમકી આપ્યા બાદ સોના-ચાંદીના ભાવમાં જોરદાર કડાકો બોલાયો છે. ટ્રમ્પ દ્વારા ઈરાનને હોર્મુઝ જળમાર્ગ ખોલવા માટે અલ્ટીમેટમ અપાયું હતું, જોકે તે પહેલા જ ઈરાન પર ભયાનક હુમલા શરૂ કરી દેવાયા છે. મધ્ય-પૂર્વની આ ભયાનક સ્થિતિ જોઈને રોકાણકારો સાવધાન થઈ ગયા છે, જેના કારણે સોના-ચાંદીના ભાવમાં ધરખમ ઉથલ-પાથલ જોવા મળી છે.

MCX પર ચાંદીના ભાવમાં રૂ.10900ની ઉથલપાથલ

મલ્ટી કોમોડિટી એક્સચેન્જ (MCX) પર ચાંદીના ભાવની વાત કરીએ તો, ગઈકાલે પ્રતિ કિલો ચાંદીનો ભાવ રૂ.233,379.00 પર બંધ થયા બાદ આજે રૂ.232,000.00 પર ખુલ્યો હતો. જે આખા દિવસના ટ્રેડિંગ દરમિયાન ઊંચામાં રૂ.235,547.00 પર સ્પર્શ્યા બાદ નીચમાં રૂ.224,621.00 પર પહોંચ્યો હતો. એટલે કે MCX એક્સ પર આજે ચાંદીના ભાવમાં રૂ.10,926ની ઉથલ-પાથલ જોવા મળી છે. MCX પર આજે રાત્રે 10.00 વાગ્યા સુધીમાં ચાંદીનો ભાવ રૂ.2,29,500 પર ટ્રેડ થઈ રહ્યો છે.

આ પણ વાંચો : ટ્રમ્પની ધમકી બાદ શેરબજાર કડડભૂસ!

MCX પર સોનાના ભાવમાં 2400ની ઉથલપાથલ

MCX પર સોનાના ભાવની વાત કરીએ તો, ગઈકાલે સોનાનો ભાવ રૂ.149,981.00 પર બંધ થયા બાદ આજે રૂ.149,759.00 પર ખુલ્યો હતો. જે આખા દિવસના ટ્રેડિંગ દરમિયાન ઊંચામાં રૂ.150,860.00 પર સ્પર્શ્યા બાદ નીચમાં રૂ.148,424.00 પર પહોંચ્યો હતો. એટલે કે MCX એક્સ પર આજે ચાંદીના ભાવમાં રૂ.2,436ની ઉથલ-પાથલ જોવા મળી છે. MCX પર આજે રાત્રે 10.00 વાગ્યા સુધીમાં ચાંદીનો ભાવ રૂ.1,49,877 પર ટ્રેડ થઈ રહ્યો છે.

સ્થાનિક સર્રાફા બજારમાં પણ સોના-ચાંદીના ભાવ ગગડ્યા

વૈશ્વિક બજારમાં જોવા મળી રહેલી અનિશ્ચિતતા અને રોકાણકારોની સતર્કતાની સીધી અસર સ્થાનિક સર્રાફા બજાર પર જોવા મળી છે. ઓલ ઈન્ડિયા સર્રાફા એસોસિએશન દ્વારા જાહેર કરાયેલા ડેટા મુજબ, આજે ચાંદીની કિંમતમાં 2,000 રૂપિયા (લગભગ 1 ટકા)નો મોટો ઘટાડો નોંધાયો છે. પ્રતિ કિલો ચાંદીની કિંમત સોમવારના રૂ.2,42,000ના મુકાબલે મંગળવારે ઘટીને 2,40,000 પર આવી ગઈ છે. જ્યારે 10 ગ્રામ 99.9 ટકા શુદ્ધતા ધરાવતા સોનાની કિંમતમાં રૂ.600 (0.4 ટકા) ઘટીને 1,53,200 રૂપિયા નોંધાઈ છે. ગઇકાલે તેનો ભાવ 1,53,800 રૂપિયા પર બંધ થયો હતો.

આ પણ વાંચો : એર ઈન્ડિયાના CEO કેમ્પબેલ વિલ્સનનું રાજીનામું!