ભારતીય માર્કેટ ફ્લોપ: Global Equity ETFમાં માઇનસ 7.5% રિટર્ન, સાઉથ કોરિયા ચમક્યું

Global Equity ETFs 2025-26: વર્ષ 2025-2026 ના ગ્લોબલ ઇક્વિટી ETFs ના કુલ રિટર્નના આંકડા જાહેર કરવામાં આવ્યા છે, જે વૈશ્વિક રોકાણની દિશામાં મોટો બદલાવ દર્શાવે છે. આ યાદીમાં સાઉથ કોરિયા (EWY) 314.8% ના અભૂતપૂર્વ રિટર્ન સાથે વિશ્વભરમાં પ્રથમ ક્રમે રહ્યું છે. તેની પાછળ પેરુ (119.7%), તાઇવાન (106.8%) અને પોલેન્ડ (104.7%) જેવા દેશોએ પણ રોકાણકારોને બમણાથી વધુ રિટર્ન આપીને આશ્ચર્યચકિત કર્યા છે. વિકસિત બજારોની વાત કરીએ તો, અમેરિકા (SPY) 30.6% અને ફ્રાન્સ 31.8% ના મજબૂત રિટર્ન સાથે ગ્રીન ઝોનમાં ટકી રહ્યા છે.

ભારતીય શેરબજારની સ્થિતિ: રિટર્નના મામલે નકારાત્મક પ્રદર્શન

વૈશ્વિક સ્તરે જ્યારે મોટાભાગના દેશોના શેરબજારો રોકાણકારો પર કમાણીનો વરસાદ કરી રહ્યા છે, ત્યારે ભારતીય બજારની સ્થિતિ ચિંતાજનક જોવા મળી છે. આંકડા મુજબ, ભારત (INDA) નું કુલ રિટર્ન -7.5% નોંધાયું છે, જે દર્શાવે છે કે આ સમયગાળા દરમિયાન ભારતીય બજારે નકારાત્મક વળતર આપ્યું છે. ભારતની સાથે ફિલિપાઇન્સ (-0.7%), સાઉદી અરેબિયા (-2.4%) અને ઇન્ડોનેશિયા (-27.5%) પણ રેડ ઝોનમાં (નુકસાનમાં) ચાલી રહેલા દેશોની યાદીમાં સામેલ છે.

આ પણ વાંચો: ત્રણ વાગ્યા બાદ મંદીનું વાવાઝોડું, સેન્સેક્સમાં 1092 પોઈન્ટનું ગાબડું

ભારતીય બજારના નબળા દેખાવ પાછળના સંભવિત કારણો

ચાર્ટમાં દેખાતા ભારતના -7.5% ના નકારાત્મક રિટર્ન પાછળ આર્થિક અને ભૌગોલિક પરિબળો જવાબદાર હોઈ શકે છે. મુખ્ય કારણોમાં વૈશ્વિક સંસ્થાગત રોકાણકારો (FIIs) દ્વારા ભારતીય બજારમાંથી નફો બુક કરીને અન્ય ઉભરતા બજારો (જેમ કે સાઉથ કોરિયા કે તાઇવાન) તરફ ફંડ ડાયવર્ટ કરવું હોઈ શકે છે, જ્યાં રિટર્નની સંભાવનાઓ ઘણી ઊંચી જોવા મળી છે. આ ઉપરાંત, સ્થાનિક સ્તરે કંપનીઓના નબળા ત્રિમાસિક પરિણામો, મોંઘવારીનો ઊંચો દર અને ક્રૂડ ઓઈલની કિંમતોમાં અસ્થિરતા જેવા મેક્રો-ઇકોનોમિક પડકારોએ પણ ભારતીય ઇક્વિટી માર્કેટ પર મોટો દબાવ બનાવ્યો હોવાની પૂરેપૂરી શક્યતા છે.