અમેરિકામાં સૌથી મોટો સ્ટીલ પ્લાન્ટ સ્થાપશે ભારતીય કંપની! ટ્રમ્પે ટેરિફના નામે પોતાની જ પીઠ થાબડી

Essar Group To Invest $18 Billion In US: Build Historic Steel Plant In Iowa | ભારતનું એસ્સાર ગ્રૂપ અમેરિકામાં કુલ $18 બિલિયનનું જંગી રોકાણ કરવા જઈ રહ્યું છે. વ્હાઇટ હાઉસમાં અમેરિકન પ્રમુખ ડોનાલ્ડ ટ્રમ્પે આ મહત્ત્વપૂર્ણ પ્રોજેક્ટની જાહેરાત કરી હતી. આ રોકાણ માત્ર અમેરિકાના સ્ટીલ ઉદ્યોગનું ચિત્ર જ નહીં બદલે, પરંતુ વૈશ્વિક સપ્લાય ચેઈનમાં ભારતીય બિઝનેસ હાઉસનું વર્ચસ્વ પણ સાબિત કરશે.

આયોવામાં આકાર પામશે યુએસ ઇતિહાસનો સૌથી વિશાળ સ્ટીલ પ્લાન્ટ

આ વિશાળ પ્રોજેક્ટ અંતર્ગત એસ્સાર ગ્રૂપ પોતાની માલિકીની યુએસ સ્થિત કંપની 'મેસાબી મેટાલિક્સ' મારફતે આયોવા (Iowa) રાજ્યમાં $15 બિલિયનના ખર્ચે એક અદ્યતન સ્ટીલ પ્લાન્ટનું નિર્માણ કરશે.

• આ પ્રોજેક્ટ અમેરિકાના ઇતિહાસના સૌથી મોટા સ્ટીલ સંકુલ પૈકીનો એક બનવા જઈ રહ્યો છે.
• આ પ્લાન્ટની ઉત્પાદન ક્ષમતા તબક્કાવાર રીતે વાર્ષિક 10 મિલિયન ટન (1 કરોડ ટન) સુધી પહોંચાડવામાં આવશે.
• પ્રોજેક્ટના પ્રથમ તબક્કામાં વાર્ષિક 7.5 મિલિયન ટન સ્ટીલ ઉત્પાદનનું લક્ષ્ય રાખવામાં આવ્યું છે.
• પ્લાન્ટમાંથી પ્રથમ વ્યાપારી સ્ટીલ ઉત્પાદન વર્ષ 2030 સુધીમાં શરૂ કરવાનું લક્ષ્ય નિર્ધારિત કરવામાં આવ્યું છે.

મિનેસોટાથી આયોવા: દેશમાં જ સંપૂર્ણ ઇન્ટિગ્રેટેડ સપ્લાય ચેઇનનું નિર્માણ

ભારતીય જૂથે માત્ર સ્ટીલ ઉત્પાદન પૂરતું સીમિત ન રહેતાં અમેરિકાની ધરતી પર સંપૂર્ણ ઇન્ટિગ્રેટેડ સ્ટીલ સપ્લાય ચેઇન તૈયાર કરવાનો માસ્ટરપ્લાન બનાવ્યો છે. એસ્સાર ગ્રૂપે મિનેસોટાના નાશવાક સ્થિત મેસાબી મેટાલિક્સના આયર્ન ઓર પ્રોજેક્ટમાં પહેલેથી જ $2.5 બિલિયનથી વધુ રકમનું રોકાણ કરી દીધું છે.

એસ્સારના જણાવ્યા અનુસાર, મિનેસોટા ખાતે શરૂ થયેલી આ કામગીરી છેલ્લા લગભગ 50 વર્ષોમાં યુએસમાં શરૂ થનારી પ્રથમ નવી આયર્ન ઓર ખાણ અને પેલેટ પ્લાન્ટ છે. 16,000 એકરથી વધુ વિસ્તારમાં ફેલાયેલી આ સુવિધા જ્યારે પૂર્ણ ક્ષમતાએ કાર્યરત થશે, ત્યારે તે દર વર્ષે 7 મિલિયન ટન સુધીના ડાયરેક્ટ રિડક્શન ગ્રેડના આયર્ન ઓર પેલેટ્સનું ઉત્પાદન કરશે. મિનેસોટાની ખાણોમાંથી નીકળતો આ કાચો માલ આયોવાના પ્લાન્ટમાં સ્ટીલ બનાવવા માટે ઉપયોગમાં લેવાશે.

રોજગારીનું મોટું સર્જન અને અર્થતંત્ર પર $95 બિલિયનનો પ્રભાવ

વ્હાઇટ હાઉસ દ્વારા જાહેર કરવામાં આવેલા સત્તાવાર આંકડા અનુસાર:

• આ પ્લાન્ટ ઓછામાં ઓછી 1,750 કાયમી પૂર્ણકાલીન નોકરીઓ ઊભી કરશે.
• પ્લાન્ટના પ્રથમ તબક્કાના બાંધકામ દરમિયાન અંદાજે 6,000 જેટલી કન્સ્ટ્રક્શન જોબ્સનું સર્જન થશે.
• મિનેસોટા ફેસિલિટીમાં હાલમાં 200 થી વધુ લોકો કાર્યરત છે, જે પૂર્ણ ક્ષમતાએ પહોંચતા વધુ 350 લોકોને રોજગારી પૂરી પાડશે.
• વ્હાઇટ હાઉસનો અંદાજ છે કે બાંધકામ અને કામગીરીના પ્રથમ 10 વર્ષ દરમિયાન આ પ્રોજેક્ટ આર્થિક ગતિવિધિઓ દ્વારા લગભગ $95 બિલિયનનો જંગી આર્થિક પ્રભાવ પેદા કરશે.

ટ્રમ્પે પોતાની જ પીઠ થાબડી કહ્યું- આ બધુ મારા ટેરિફના કારણે શક્ય છે

વ્હાઇટ હાઉસમાં આયોજિત ઇવેન્ટ દરમિયાન પ્રમુખ ટ્રમ્પે કહ્યું કે, દરેક વ્યક્તિ પોતાના પ્લાન્ટ્સ અહીં યુએસમાં એટલા માટે સ્થાપી રહી છે કારણ કે તેઓ ટેરિફ ચૂકવવા માંગતા નથી.